لە باکووری کوردستان و تورکیا 98 کەس بە تۆمەتی ئەندامبوون لە پەکەکە دەستگیرکران

 

 

هێزە ئەمنییەکان تورکیا بەرەبەیانی رۆژی دووشەممە 27ـی تشرینی دووەمی 2023 لە ئۆپەراسیۆنێکی هاوکاتدا لە نۆ پارێزگای باکووری کوردستان و نۆ پارێزگای تورکیا، هەڵیانکوتایە سەر چەندین ماڵ و ناونیشان و 98 کەسیان بە تۆمەتی ئەندامبوون و کارکردن بۆ پەکەکە دەستگیرکرد.

 

بەگوێرەی راگەیێندراوێک کە لەلایەن وەزارتی ناوخۆی تورکیا بڵاوکراوەتەوە، ئۆپەراسیۆنەکە لە پارێزگاکانی ئاگری، چەولیگ، خارپێت، دیلۆک، جۆلەمێرگ، مێردین، سەمسور، سێرت و روهای باکووری کوردستان و پارێزگاکانی ئانتالیا، بورسا، کۆجائەلی، موغڵا، عوسمانییە، یاڵۆڤا، ئیزمیر، ئادانا و کۆنیا ـی تورکیا کراوە.

 

بەگوێرەی زانیارییەکان ژمارەیەک لە بەرپرسانی پارتی یەکسانی و دیموکراسی گەلان-هەدەپ لەنێو دەستگیرکراوەکاندان. 

 

لە تورکیا و باکووری کوردستان رۆژانە هێزە ئەمنییەکان هەڵدەکوتنە سەر ماڵان و بە "بیانووی پەکەکە" خەڵکی سڤیل و سیاسەتمەدارانی کورد دەستگیر دەکەن، لە کاتێکدا بەشێک لەوانەی دەستگیر دەکرێن، ئەندام و لایەنگری هەدەپ و هەدەپەن.