لە راپەڕین کوڕێکی 17 ساڵان بە دەستڕێژی گوللە دەکوژرێت
رووداو دیجیتاڵ
گوتەبێژی پۆلیسی راپەرین رایگەیاند، سەرلەبەیانی ئەمڕۆ دەستڕێژی گوللـە لە ئۆتۆمبێلێک کراوە و بەهۆیەوە کوڕێکی تەمەن 17 ساڵ کە لە نێو ئۆتۆمبێلەکە بووە گیانی لەدەستداوە.
رۆژی پێنجشەممە 27-07-2023 شۆڕش ئیسماعیل، گوتەبێژی پۆلیسی راپەرین بە تۆڕی میدیایی رووداوی گوت "رووداوەکە لەنێوان ناحیەی حاجیاوا و سەرکەپکان بووە".
بەگوتەی شۆڕش ئیسماعیل، شوێنی رووداوەکە چۆڵەوانی بووە، بۆیە "تۆمەتبار هەڵهاتووە." هێزەکانیان پەڕاوی لێکۆڵینەوەیان بۆ رووداوەکە کردووەتەوە و گەڕان بە دوای تۆمەتبار بەردەوامە.
لەبارەی هۆکاری تەقەکردن لەو گەنجە، گوتەبێژی پۆلیسی راپەرین گوتی، "تائێستا دیار نییە بۆچی ئەو ئۆتۆمبێلە دەستڕێژی گوللەی لێکراوە و لێکۆڵینەوە لەوبارەوە دەکرێت، دیاریش نییە ئەو گەنجە بە تەنیا لە نێو ئۆتۆمبێلەکەدا بووە یاخود خەڵکی دیکەی لەگەڵدا بووە، بەڵام ئەوەی روونە؛ لەنێو ئەو ئۆتۆمبێلە تەنیا ئەو گەنجە کوژراوە."