فەرماندەی لیوای 18ی پێشمەرگە شەهید بوو

 

ساڵح زراری، فەرماندەی لیوای 18ـی پیادەی پێشمەرگە یەکێک بوو لە بریندارەکانی ئەو شەڕەی رۆژی 22ـی ئەم مانگە لەنێوان هێزەکانی پێشمەرگە و سوپای عێراق روویدا، کە ئەو رۆژە دوو پێشمەرگە شەهید و 11ـیی دیکە بریندار بوون. 

 

بەیانیی ئەمڕۆ (پێنجشەممە 26-10-2023) دەوروبەری کاژێر 04:00ی بەیانی، دوای سێ رۆژ مانەوەی لە نەخۆشخانە، بەهۆی سەختیی برینەکەیەوە ساڵح زراری شەهید بوو.

 

بڕیارە کاژێر 9:00ی ئەمڕۆ تەرمی عەقید ساڵح لە گوندی زەرگەزەوی بەخاکبسپێردرێت. هەر لەوێ وەزارەتی پێشمەرگە مەراسیمێک بۆ بەخاکسپاردنی رێکدەخات.

شەڕەکە لەکاتێکدابوو، 19-10-2023 هێزەکانی فیرقەی 14ـی سوپای عێراق بەپێی رێککەوتنێک، چوار خاڵی سەربازیی چاودێرییان لەسەر چیای قەرەچووخ لە پەکەکە وەرگرتەوە، دواتر هێزێکی سوپای عێراق لە خاڵە سەربازییەکان جێگیرکران.

22ی تشرینى یەکەمى 2023 غازى فەیسەڵ، بەرپرسی پێشمەرگە خۆبەخشەکانى چیاى قەرەچووخ لە قەزاى مەخموور بە تۆڕى میدیایی رووداوى راگەیاند، "پێکدادانى نێوان سوپاى عێراق و هێزەکانى پێشمەرگە لە نزیک کەمپى ئاوارەکانى مەخموور، لەسەر سێ خاڵى سەربازی بووە کە دەکەوێتە رۆژهەڵاتى کەمپەکە و پێشتر چۆڵ کراوە و سوپاى عێراق دەیەوێت وەریبگرێتەوە."

 

غازى فەیسەڵ گوتیشى، "بەرپرسانى کەمپى مەخموور داویان کردووە سوپاى عێراق لە ھێرشی تورکیا بۆ سەر ئەو کەمپە بیانپارێزێت، ئەوانیش داوایان کردووە ئەو سێ خاڵە سەربازییە رادەست بکەن بۆ ئەوەى بیانپارێزن، لەکاتێکدا ئەو سێ خاڵە بەگوێرەى رێککەوتنى ئەمنى نێوان پێشمەرگە و ئۆپەراسیۆنە هاوبەشەکانى نەینەوا لە سنوورى دەسەڵاتى پێشمەرگەدایە، بۆیە پێشمەرگە ویستوویەتی بەدەستى بهێنێتەوە."