کشتوکاڵی ورمێ: ئەم ساڵ 26 هەزار تۆن هەنگوینمان هەیە
رووداو دیجیتاڵ
بەڕێوەبەری کشتوکاڵی پارێزگای ورمێ دەڵێت، ''ئەم ساڵ بە بەرهەمهێنانی 26 هەزار تۆن هەنگوین، پلەی یەکەممان لەسەر ئاستی پارێزگاکانی ئێران بەدەستهێناوە''؛ گوتیشی، 22٪ی کۆی بەرهەمی هەنگوینی ئێران لە ورمێ بەرهەم دێت.
خەسرۆ شەهبازی، سەرۆکی رێکخراوی کشتوکاڵی پارێزگای ورمێی رۆژهەڵاتی کوردستان رایگەیاند، ورمێ بۆ بەرهەمهێنانی هەنگوین، لەسەر ئاستی پارێزگاکانی ئێران پلەی یەکەمی بەدەستهێناوە.
خەسرۆ شەهبازی گوتی، 22٪ی کۆی بەرهەمی هەنگوینی ئێران لە ورمێ بەرهەم دێت کە ئەم ساڵ دەگاتە 26 هەزار تۆن.
بەگوتەی سەرۆکی رێکخراوی کشتوکاڵیی ورمێ، زیاتر لە شەش هەزار و 200 کەس هەنگەوان لە پارێزگاکە هەن، کە بەگشتی هەلیکاریان بۆ زیاتر لە 18 هەزار کەس رەخساندووە.
خەسرۆ شەهبازی ئاماژەی بەوەشکرد، زیاتر لە هەزار و 500 جۆر گیا و رووەک لە سنووری ورمێ هەن کە دەرفەتێکی گونجاویان بۆ بەرهەمهێنانی هەنگوین رەخساندووە و ''پێشبینی دەکرێت بەرهەمی هەنگوینی پارێزگاکە 10٪ زیاد بکات.''
بەپێی راپۆرتی رێکخراوی فاو، ئێران پلەی سێیەمی بەرهەمهێنانی هەنگوینی لە ئاستی جیهاندا هەیە و ساڵی 2022 نزیکەی 77 هەزار تۆن هەنگوین لەو وڵاتەدا بەرهەم هاتووە.