پەرلەمانتارێکی پارتی: نەینەوا لەژێر دەسەڵاتی حکومەتدا نەماوە

 

شێروان دووبەردانی، ئەندامی فراکسیۆنی پارتی دیموکراتی کوردستان لە ئەنجوومەنی نوێنەرانی عێراق لە بەرنامەی رووداوی ئەمڕۆ کە نوێنەر فاتیح پێشکێشی دەکات، گوتی: "ئێمە داوامان کردووە بەڕێوەبەری ناحیەی باشیک لە پۆستەکەی بەردەوامبێت تاوەکو هەڵبژاردنی ئەنجوومەنی پارێزگاکان دەکرێت، بەڵام پیلانگێڕی سیاسی دژی پارتی دیموکراتی کوردستان کرا و بۆ دژایەتی کورد و وەک موزایەدەی هەڵبژاردن لە قەزا و ناحیەکانی موسڵ کێشە بۆ بەرپرسە کارگێڕییەکان دروستدەکرێت".

 

ئەو گوتانەی دووبەردانی لەکاتێکدان، رۆژی دووشەممە 24-04-2023 پەرلەمانتارانی فراکسیۆنی پارتی لە دەشتی نەینەوا لە کۆنفرانسێکی رۆژنامەڤانیدا یاداشتێکی ناڕەزایی فەرمییان بڵاوکردەوە لەبارەی گۆڕینی بەڕێوەبەری ناحیە و بەرپرسانی کارگێڕیی قەزاکانی دەشتی نەینەوا و بە هەوڵێک بۆ نانەوەی کێشە لەنێوان پێکهاتەکانی پارێزگاکەیان زانی.

 

نوێنەرانی پارتی لە بازنەی نەینەوا هۆشداری لەبارەی دۆخی دەشتی نەینەوا دەدەن و دەڵێن، ژمارەیەک کەس و لایەنی سیاسی، دەیانەوێت کێشە و ناکۆکی لەنێوان لایەن و پێکهاتەکانی شارەکە دروست بکەن.

 

شەریف سلێمان، یەکێکە لە نوێنەرانی پارێزگای نەینەوایە و لە کۆنفرانسە رۆژنامەڤانییەکەدا گوتی: ئێمە وەکو فراکسیۆنی پارتی، لەدژی هەر گۆڕانکارییەکی ئیدارین کە جیاوازی لەنێوان پێکهاتەکاندا بکات.

 

شێروان دووبەردانی، ئەندامی فراکسیۆنی پارتی دیموکراتی کوردستان لە ئەنجوومەنی نوێنەرانی عێراق لەبارەی بڕیارە سیاسی و کارگێڕییەکان لە نەینەوا دەڵێت "ئێستا نەینەوا لەدەستی حکومەتی عێراقیشدا نەماوە، لەماوەی رابردوودا سێ سەرۆکوەزیرانی پێشووی عێراق بڕیاریان دەرکردووە بۆ دوورخستنەوەی یەک لیوای حەشدی شەعبی لە موسڵ، بەڵام بڕیارەکەیان جێبەجێ نەکراوە".