ناوەندی کاشەڤانی پولوور لە دێرسیم بۆ پشووی نیوەی ساڵ هەموو بلیتەکانی فرۆشراون

 

 

فەرهاد ئاڵای، بەڕێوەبەری ناوەندی وەرزش و لاوانی پولوور دەڵێت، "بۆ پشووی نیوەی ساڵ تەواوی بلیتەکان فرۆشراون و 100%ی شوێنەکانمان گیراون، هەروەها شوێنی کاشەڤانیمان قەرەباڵخە. لە ماوەی پشووی نیوەی ساڵدا پلانمان وایە پێشوازی لە 13 تاوەکو 15 هەزار گەشتیار بکەین".

 

ئەم ناوەندە ماوەی حەوت ساڵە کراوەتەوە و لەم ماوەیەدا گەشتیارێکی زۆر روویان تێکردووە کە ژمارەیەکی بەرچاویشیان بیانی بوون.

 

زۆربەی ئەو گەشتیارانەی سەردانی ئەو ناوچە کەشتیارییە دەکەن لە خارپێت، ئامەد، ئیستەنبووڵ، ئەرزینجان، مەڵەتی و ئیزمیرەوە دەچن. ئەوان دەڵێن، لەڕووی خەرجییەوە ناوەندی کاشەڤانی شارۆچکەی پولوور هەرزانترە، لە کاتێکدا خاوەن هەمان تایبەتمەندیی ناوەندەکانی دیکەیە.

 

موسلیم بایراک، گەشتیار دەڵێت، "شوێنێکی خۆشە، تاڕاددەیەک بچووک و هەرزانیشە. بەراورد بە ناوەندەکانی دیکە، هەر زۆر هەرزانە. دەتوانین تێیدا چا بخۆینەوە و خواردن بخۆین. لەو خوارەوە خواردنی خۆش هەیە".

 

یاریزانانی خلیسکێنە کە پێشتر لە ناوەندەکانی دیکەی خلیسکێنە کاتیان بەسەردەبرد، دەڵێن، خلیسکێنە لە بناری چیای مونزوور تام و چێژێکی دیکەی هەیە و گۆڕانکارییەکیشە. عەلی خزر چەلیک، گەشتیار دەڵێت، "لەگەڵ بینینی دیمەنە جوانەکەی چیای مونزوور، خلیسکێنە دەکەین".

 

بەرپرسانی ناوچە گەشتیارییەکە دەڵێن، هەموو کارێکی پێویستیشیان کردووە بۆئەوەی ئەمساڵ لەو ناوەندەدا پاڵەوانێتیی نێودەوڵەتیش بەڕێوەبچێت.