سەرۆکی ئینستتیوتی کوردی لە رۆما: لە ئیتاڵیا بەگرنگییەوە باسی سەردانەکەی سەرۆکوەزیران بۆ هەولێر دەکرێت

 

رۆژی هەینی 23-12-2022، سۆران ئەحمەد، سەرۆکی ئینستتیوتی کوردی لە رۆمای پایتەختی ئیتاڵیا بەشداریی بوولتەنی کاژێر 10:00ـی رووداوی کرد و باسی بایەخی سەردانەکەی جۆرجیا میلۆنی، سەرۆکوەزیرانی ئیتاڵیا بۆ عێراق و هەرێمی کوردستان و بەدیاریکراوی شاری هەولێر کرد.

 

سۆران ئەحمەد چەند زانیارییەکی لەسەر کورد و ئیتاڵیا باسکرد، لەوبارەیەوە لەبارەی ژمارەی کورد لەو وڵاتەوە رایگەیاند: "نزیکەی 10 هەزار کورد لە ئیتاڵیا دەژین، بەشێکیان پێشتر هاتوون و پزیشک و ئەندازیاریان تێدایە، بەشێکیشیان لەوانەن کە تازە هاتوونەتە ئەم وڵاتە و لەبواری کارکردندان و هەندێکیان کۆمپانیایان هەیە، کوردەکان لە هەندێک شارەکانی بەتایبەت وەکو بوڵزانۆ، مێنێسیا، تۆرینۆ ، واتە لەشارەکانی سەرووی ئیتاڵیا کە ئیشوکاریان تێدا زیاترە."

 

سەبارەت بەوەی ئیتاڵییەکان چۆن دەڕواننە هەرێمی کوردستان روونیکردەوە: "ئیتاڵییەکان لە کۆنەوە کورد دەناسن و رێزێکی تایبەتیان بۆ کورد هەیە، لەناو خەڵکدا زۆر باوە، تەنیا لەم چەند ساڵەی دوایی لە پرسی کوردی زیاتر لە 50 کتێب لەسەر کورد لەم وڵاتە نووسراون، جگە لەوەی زۆر زانکۆ و خوێندکار خەریکی توێژینەوەن لەسەر کورد، زۆر خوێندکار دێنە لای ئێمە، جگە لەوە ئێمە وەکو دەزگا سەرقاڵی پرسەکانی شوێنەواریین، بۆیە لە رووی کولتوورییەوە پەیوەندیی هەیە."

 

ئیتاڵیا شەشەمین هاوبەشی بازرگانیی هەرێمی کوردستانە، هاوردەی ئەو وڵاتە بۆ هەرێمی کوردستان ساڵانە 700 ملیۆن دۆلارە، جگە لەوە 64 کۆمپانیای ئیتاڵی لە هەرێمی کوردستان هەن.

 

سەرۆکی ئینستتیوتی کوردی لە رۆما لەبارەی پەیوەندییە ئابوورییەکان، گوتی: "لە رووی ئابوورییەوە هێشتا بەداخەوە ئەو پەیوەندییە لەنێوان هەرێمی کوردستان و ئیتاڵیا بەو جۆرە نییە کە زۆر بێت، هەرچەند ئیتاڵیا دەتوانێت باشترین هاوپەیمان بێت بۆ کورد، لەبەر ئەوەی حەوتەم وڵاتی پیشەسازییە لە جیهان، چ لە رووی کۆمپانیای بچووکییەوە کە ملیۆنەها کۆمپانیای هەیە، ئەوەش وادەکات بەئاسانی بێتە هەرێمی کوردستان، بەڵام بەداخەوە هێشتا لەو رووەوە نەچووینەتە پێشەوە، بەڕای من زەرەرێکە بۆ هەردوولا."

 

لەبارەی باسکردنی سەردانەکەی سەرۆکوەزیرانی ئیتاڵیا بۆ عێراق و هەرێمی کوردستان لە میدیاکانی ئیتاڵیا، دەڵێت، "بەڵێ لە میدیای ئیتاڵی باسی سەردانەکەی سەرۆکوەزیران بۆ عێراق و هەرێمی کوردستان کراوە، چونکە لەکاتێکی هەستیاردا هاتووە، بەتایبەت دەبوو بودجەی دەوڵەت پەسندبکرێت، لەبەر ئەوەشی کە حکومەتەکە نوێیە، راستییەکەی هەندێک کێشەی لە ناو پەرلەمان و دەوڵەت هەیە، هەروەها لەبارەی پرسی بودجەشەوە، بۆیە ئەم سەردانە جۆرە گرنگییەکی تایبەتی هەیە، راستییەکەی لەم سەردانەدا زیاتر باسی عێراق ناکرێ، بەڵکو زیاتر باسی سەردانەکەی سەرۆکوەزیرانی ئیتاڵیا بۆ شاری هەولێر دەکرێت."

 

هەروەها لەبارەی ئەو قسانەی لە میدیای ئیتاڵیا باسکراوە گوایە سەرۆکوەزیران بۆ خۆدەربازکردن لە پرسی پەسندکردنی بودجە سەردانەکەی کردووە، سۆران ئەحمەد دەڵێت: "هەندێک رۆژنامەی ئیتاڵی بەو شێوەیە باسی سەردانەکە دەکات، لەبەر ئەوەی جۆرجیا میلۆنی ئافرەتێکی راستڕەوە، هەندێک لە رۆژنامەکان دەڵێن، ون بووە."

 

سەرۆکی ئینستتیوتی کوردی لە رۆما لەبارەی چۆنێتی سوودوەرگرتن لە تواناکانی ئیتاڵیا، دەڵێت: "کورد هێشتا ئیتاڵیا ناناسێت، ئیتاڵیا لە زۆر رووەوە بایەخی زۆری هەیە، بە نموونە لە رووی خوێندنەوە، ئەم وڵاتە وڵاتێکی باشە بۆ مارکێتینگ، لەبەر ئەوەی توانایەکی کولتووریی زۆری تێدایە، هەروەها پەیوەندیی لەگەڵ خەڵکەکە ئاسانترە، بەڵام کێشەکە ئەوەیە کورد هێشتا بەرنامەیەکی ئابووری بۆ خۆی لەمبارەیەوە دانەناوە، کورد هەموو شتێکی بە هەرزان دەوێت و کار لەسەر ئەوە ناکات بازاڕێکی سیستماتێک بۆ خۆی دروست بکات، لەو بارەدا باشترین وڵات ئیتاڵیایە."

 

ئاماژەی بەوەش کرد، لە رێگەی ئینستتیوتی کوردی لە رۆما هەوڵیانداوە بۆ بەهێزکردنی پەیوەندییەکانی ئەو وڵاتە و هەرێمی کوردستان و روونیدەکاتەوە: "ئێمە بۆ پەیوەندییەکان ژمارەیەک گرووپی پەرلەمانتارانمان هێناوە بۆ هەرێمی کوردستان، بەڵام بەسەردان کۆتایی نایەت، دەبێت پرۆگرامی بۆ دابنرێت."

 

بە بڕوای سۆران ئەحمەد، لە رووی ئابوورییەوە، هەرێمی کوردستان دەتوانێت سوودێکی زۆر لە ئیتاڵیا ببینێت و دەڵێت: "ئیتاڵیا یەکێکە لە پێشکەوتووترین وڵاتەکان لە رووی کشتوکاڵییەوە، زیاتر لە 1400 بەرهەمی جۆری کشتوکاڵی هەیە و تەنیا گەنم 140 جۆری هەیە، کە ئەمریکا بەو گەورەییەی خۆی حەوت جۆری هەیە، فەرەنسا کە لەگەڵ ئیتاڵیا وڵاتی شەرابن هەشت جۆر ترێی هەیە، ئیتاڵیا  140 جۆر ترێی هەیە، دەوڵەمەندیی ئەم وڵاتە لە رووی کشتوکاڵەوە بێسنوورە."

 

سەرۆکی ئینستتیوتی کوردی لە رۆما لەبارەی کاری دامەزراوەکەیان گوتی: "دەزگاکەی ئێمە بەگشتی لە بواری کولتووری و سیاسیی کاردەکات، لە رووی کولتوورییەوە بڵاوکردنەوەی پەرتووکەکانی کوردی بۆ زمانی ئیتاڵی و بەپێچەوانەشەوە، جگە لەوە لە زانکۆی رۆمایسێ زمانی کوردی فێری خوێندکاران دەکات؛ هەروەها سەرقاڵی دانانی فەرهەنگێکی زمانی کوردی-ئیتاڵیین، لە رووی سیاسیشەوە گرووپی پەرلەمانتارییمان دروستکردووە لەنێوان پەرلەمانتارانی ئیتاڵی بۆ دۆستایەتی لەگەڵ کوردستان و چەند جارێک سەردانی کوردستانیان کردووە؛ وەزیری کاری ئەم کابینەیەی ئێستای حکومەتی ئیتاڵیا یەکێکە لە ئەندامانی ئەو گرووپە."