رووداو دیجیتاڵ
سەرەڕای بڕیاری وەزارەتی پەروەردە بۆ دەستپێکردنەوەی خوێندن، مامۆستایان لە بایکۆتکردن و گردبوونەوە بەردەوامن. پەیامنێری رووداو لە سلێمانی دەڵێت، ئەمڕۆ مامۆستایان لە سلێمانی ''قەرەباڵخترین'' خۆپێشاندانیان کرد.
رۆژی یەکشەممە 22-10-2023، هاوکات لەگەڵ فەرمانی ئالان حەمەسەعید، وەزیری پەروەردەی هەرێمی کوردستان بۆ کردنەوەی سەرجەم قوتابخانەکان، مامۆستایانی وانەبێژ و هەمیشەیی لە سنووری پەروەردەکانی سلێمانی، هەڵەبجە و ئیدارە سەربەخۆکانی راپەڕین، گەرمیان و قەزای کۆیە، نەچوونەوە هۆڵەکانی خوێندن و لە گردبوونەوە و ناڕەزایەتی بەردەوام بوون.
وانەبێژان داوای گرێبەست و بەشێکیان بوون بە هەمیشەیی دەکەن. مامۆستایانی هەمیشەیی و فەرمانبەرانیش داوای مووچەی مانگەکانی هەشت، نۆ و 10 دەکەن.
سازگار سەڵاح، پەیامنێری تۆڕی میدیایی رووداو لە هەڵەبجە دەڵێت، تاوەکو ئێستا هیچ قوتابخانەیەک بە فەرمی دەستی بە خوێندن بۆ ساڵی نوێ نەکردووە و تەنیا دوو قوتابخانەی تایبەت لەگەڵ یەک قوتابخانەی زمانی عەرەبی کە تایبەتە بە ئاوارەکان کراوەن.
پەیامنێری رووداو گوتیشی، لە هەڵەبجە بە رێککەوتنی نێوان بەڕێوەبەرەکان دەوام بۆ قوتابیانی 12ـی ئامادەیی کراوەیە، بەڵام هەندێک لە مامۆستایان هێشتا نەچوونەتەوە ناو هۆڵەکانی خوێندن، ''بەشێک لە فەرمانبەرانیش بۆ ئەوەی پاڵپشتیی لە مامۆستایان بکەن، گردبوونەتەوە.''
مامۆستایانی وانەبێژ و میلاک جەخت لە بەردەوامبوونی بایکۆت دەکەنەوە و دەڵێن ئەگەر داواکارییەکانیان جێبەجێ نەکرێت، ئامادە نین بچنەوە هۆڵەکانی خوێندن.
ئەوە لەکاتێکدایە ئالان حەمە سەعید، وەزیری پەروەردەی هەرێمی کوردستان لە نووسراوێکدا رۆژی پێنجشەممە 19-10-2023 بۆ مامۆستایان گوتی، "لەبەر بەرژەوەندیی گشتی و پارێزگاری لە ساڵی خوێندنی 2023-2024 لە سنووری بەڕێوەبەرایەتییە گشتییەکانی سلێمانی، هەڵەبجە، گەرمیان، راپەرین و قەزای کۆیە، بڕیارمان دا دەبێت رۆژی یەکشەممە 22ـی 10-2023 دەستەی کارگێڕیی ناوەندەکانی خوێندنی (بەڕێوەبەر، یاریدەدەر) و مامۆستایان لە سنووری ئاماژەپێکراو پابەندبن بە دەوامکردن دەرگای ناوەندەکانی خوێندن بکەنەوە".
لە هەرێمی کوردستان 36 هەزار وانەبێژ هەن. وەک مامۆستایانی وانەبێژ دەڵێن، چارەسەرکردنی گرفتەکانیان تەنیا پێویستی بە چوار ملیار دیناری دیکە هەیە، حکومەتیش دەڵێت، ئەو قەیرانە داراییەی رووی لە هەرێمی کوردستان کردووە، تەنیا مامۆستایانی نەگرتووەتەوە و هەموو مووچەخۆران گوشاریان لەسەرە.
لە سلێمانی ژمارەیەکی زۆر لە مامۆستایانی وانەبێژ و میلاک بۆ دەربڕینی ناڕەزایەتیی چوونەتە سەرشەقام و لە بەردەم پەروەردەکانی ئەو پارێزگایە گردبوونەتەوە. هۆرڤان رەفعەت، پەیامنێری تۆڕی میدیایی رووداو لە بەردەم پەروەردەی رۆژئاوای سلێمانی ئاماژەی بەوە کرد، ''لە 39 رۆژی رابردوودا کە خۆپێشاندانی مامۆستایان بەڕێوەچووە، ئەمڕۆ قەرەباڵخترین رۆژی خۆپێشاندان و گردبوونەوەکانیان بووە.''
عەتا ئەحمەد، جێگری سەرۆکی یەکێتیی مامۆستایانی کوردستان بە پەیامنێری رووداوی گوت، ''نزیکەی 40 رۆژە لەم دەڤەرە بایکۆت و خۆپێشاندان بەردەوامە و تائێستا حکومەتی هەرێمی کوردستان یەک هەنگاویشی نەناوە و دڵی مووچەخۆرانی خۆش نەکردووە؛ خەڵک تووڕەیە و بێتاقەتە، بەتایبەتی دوای پەیامەکەی بەڕێز وەزیری پەروەردە کە نەدەبووایە بە زمانی هەڕەشە لەگەڵ مامۆستایان قسە بکات.''
بەگوتەی ئەبووبەکر ئیسماعیل، پەیامنێری رووداو لە قەزای رانیەی سەر بە ئیدارەی راپەڕین، هیچ یەک لە قوتابخانەکان نەکراونەتەوە و سەرجەم مامۆستایانی وانەبێژ و هەمیشەیی لەبەردەم بەڕێوەبەرایەتیی گشتیی پەروەردەی راپەڕین گردبوونەتەوە.
لە رانیە هاوکات بەشێک لە کەسوکاری قوتابییانیش لەگەڵ مامۆستایان بەشداربوون لە گردبوونەوەیەکی بەرفراوان و بۆ جێبەجێکردنی داواکارییەکانیان پاڵپشتی لە مامۆستایانی وانەبێژ و هەمیشەیی دەکەن.
لە گەرمیانیش مامۆستایانی میلاک و وانەبێژ، فەرمانبەران، پزیشکان و کەسوکاری قوتابیان خۆپێشاندانێکی بەرفراوانیان رێکخست. هونەر حەمید، پەیامنێری تۆڕی میدیایی رووداو لە کەلار لەبارەی گردبوونەوەکە دەڵێت، ''ئەم خۆپێشاندانە جیاواز لە خۆپێشاندانەکانی رابردوو کە تەنیا وانەبێژ بوون، ئێستا هەموو چین و توێژێکیان لەگەڵە.''
مامۆستایەکی وانەبێژ بە پەیامنێری رووداوی گوت، ''لە هەموو دونیا ئەرک بەرامبەر بە مافە.''
ژمارەی مامۆستایانی وانەبێژ لە هەرێمی کوردستان 36 هەزار و 542 مامۆستایە. مووچەی وانەبێژان لەنێوان 200 بۆ 400 هەزار دیناردایە؛ کۆی پارەی مووچەی وانەبێژانی هەرێمی کوردستان 13 ملیار و 200 ملیۆن دینارە، بۆ ئەوەی هەموویان بکرێن بە گرێبەست، زیاتر لە چوار ملیار دیناری دیکە پێویستە.
تۆڕی پەیامنێرانی رووداو بەیانیی ئەمڕۆ لە بەرنامەی نووڕۆژی رووداو لەو شوێنانەی خوێندن تێیاندا بایکۆتکراوە، زانیارییان دا:
ئەبوبەکر ئیسماعیل، پەیامنێری رووداو لە رانیە گوتی: لە بەیانییەوە ئەوە چوارەمین قوتابخانەیە ئێمە سەردانی دەکەین، هەتاوەکو ئێستا یەک قوتابیشمان نەبینیوە، دوێنێش لە کۆبوونەوەیەکدا مامۆستایانی وانەبێژ و میلاک بڕیاریان داوە، بەهیچ جۆرێک دەست بە پرۆسەی خوێندن نەکەنەوە لە سنووری ئیدارەی راپەڕین.
سازگار سەڵاح، پەیامنێری رووداو لە هەڵەبجە گوتی جگە لە دوو قوتابخانەی ئەهلی، دەرگای هیچیەک لە قوتابخانەکانی دیکە لە هەڵەبجە نەکراوەتەوە و مامۆستایان نەک هەر ناچنەوە قوتابخانە، بەڵکو رایانگەیاندووە ئەمڕۆ خۆپیشاندانی فراوانیش دەکەن.
سەبارەت بە دەوامکردنی قوتابییانی پۆلی 12، سازگار سەڵاح دەڵێ "قوتابییانی پۆلی 12ـش لەو سنوورە تاوەکو ئێستا نەیانتوانیوە بەتەواوی دەوام بکەن، چونکە بۆ نموونە ئەو قوتابخانەیەی لە پشتەوەی منە، تەنیا سێ مامۆستای پۆلی 12 دەوامی تێدا دەکەن.''
لە سنووری گەرمیان تەنیا قوتابخانە تایبەت و عەرەبییەکان خوێندن تێیاندا دەستیپێکردووە
هونەر حەمید، پەیامنێری رووداو لە گەرمیان گوتی: تەنیا ئەو قوتابخانانەی بە سیستەمی عەرەبی دەخوێنن، خوێندن تێیاندا دەستی پێکردووەتەوە، هەروەها تەنیا بەشێکی ئەو قوتابخانانەش کە پۆلی 12ـیان هەیە، خوێندن تێیاندا بەردەوامە، کە ئەوانیش دەوامەکانیان بە تەواوەتی ناکەن چونکە مامۆستای تەواویان نییە.
هۆرڤان رەفعەت، پەیامنێری رووداو لە سلێمانی لەبەردەم قوتابخانەیەکەوە کە لە پۆلی یەکی سەرەتایی بۆ شەشی سەرەتایی هەیە و دەرگاکەی داخراوە، گوتی "ئەمە نموونەی زۆربەی قوتابخانەکانی سنووری سلێمانییە.''
ئەو پەیامنێرەی رووداو هەروەها دەڵێ "بەشێکی قوتابخانەکان لە سنووری پارێزگای سلێمانی کە ژمارەیان ناگاتە 15 قوتابخانە، کراونەتەوە.