لە چیای ئاگری تەرمی دوو شاخەوانەکە دۆزرانەوە کە لە 20 ئەم مانگەوە بێسەروشوێن بوون

 

شەوی یەکشەممە 21ـی تەممووز، بارزانی جەیلان، رێبەری گەشتیاری و هاوڕێیەکی بە ئامانجی دۆزینەوەی ئەو دوو شاخەوانە بێسەروشوێنە بەرەوە لووتکەی چیای ئاگری بەڕێکەوتن. لە بەرزایی چوار هەزار و 900 مەتر لەسەر ئاستی رووی دەریا تەرمی شاخەوانان دیلەک گۆکبوڵاک و محەممەد داڵگن ـیان دۆزییەوە. 

 

بەپێی زانیارییەکان بەیانی رۆژی دووشەممە 22ـی تەممووز، تیمەکانی سەر بە سەرۆکایەتیی کارەساتی لەناکاو و فریاگوزاریی تورکیا - ئافاد بۆ هێنانەخوارەوەی تەرمەکان بەڕێکەوتن. 

 

بەیانی رۆژی شەممە 20ـی تەممووز، گرووپێکی شاخەوانی کە کەسانی بیانییان لەنێودابوو لە سنووری شارۆچکەی بازید بەرەو لووتکەی چیای ئاگری بەڕێکەوتن کە پێنج هەزار و 137 مەتر لە رووی ئاستی دەریاوە بەرزە و لەسەر ئاستی بەکووری کوردستان و تورکیا بەرزترین لووتکەیە. 

 

بەهۆی نالەباری کەشوهەوا، دوو لە شاخەوانەکان لە بەرزایی پێنج هەزار و 50 مەتر بێسەروشوێن بوون کە هاووڵاتی تورکیان و یەکێکیان ژنە. 

 

هەمان رۆژ یەکێکی دیکە لەو تیمە کە هاووڵاتی هۆڵەندایە و تەمەنی 51 ساڵە، لە نزیک ئەو کامپەی لە بەزرایی چوار هەزار و 200 مەتر دایان نابوو، قاچی شکا.