نووسینگەی ئەژی ئەمین: تەنیا بۆ سەردان گەڕاوەتەوە سلێمانی

 

رۆژی دووشەممە 22-05-2023، نووسینگەکەی بە رووداوی راگەیاند، ئەژی ئەمین بۆ سەردانی دایکی گەڕاوەتەوە بۆ سلێمانی و پەیوەندیی بە یەکێتیی نیشتمانیی کوردستانەوە نەکردووەتەوە. 

 

بەپێی زانیارییەکانی رووداو، ئەمشەو بافڵ تاڵەبانی، سەرۆکی یەکێتیی نیشتمانیی کوردستان و قوباد تاڵەبانی، سەرۆکی تیمی یەکێتی لە حکومەتی هەرێمی کوردستان، سەردانی ماڵی دایکی ئەژی ئەمین دەکەن و لەوێ چاویان بەیەک دەکەوێت.

 

نووسینگەی ئەژی ئەمین لە روونکردنەوەیەکدا ئاماژە بەوەش دەکات، "بڕیارە بافڵ جەلال تاڵەبانی، سەرۆکی یەکێتیی نیشتمانیی کوردستان بۆ ئێوارەخوانێک سەردانی ئەژی ئەمین بکات و سەرلەبەری ئەو هەواڵانەش رەت دەکەینەوە کە بە هەر جۆرێکی دیکە پێناسەیان بۆ ئەم سەردانە کردووە."

 

شەوی 24-10-2022 هێزێکی ئەمنی لە قەیوان ستی لە گەڕەکی راپەڕین چوونەتە سەر ئەو ماڵەی پێشتر ئەژی ئەمینی تێدا دەژیا و دەرگە و پەنجەرەکانیان شکاند. ئەوە لەکاتێکدابوو کە دایکی ئەژی ئەمین لە ماڵەکەدا بووە.

 

ئەژی ئەمین، دوای رووداوەکانی 8ی تەممووزی ساڵی رابردووی ناو یەکێتی، کرایە بەرپرسی دەزگای زانیاری ئەو حیزبە و بەرپرسی ئاژانسی پاراستن و زانیاری / زانیاری لە ئەنجوومەنی ئاسایشی هەرێمی کوردستان، بەڵام دواتر بەهۆی ناکۆکی لەگەڵ سەرۆکی یەکێتی، سلێمانی بەجێهیشت و لە هەولێر دەژی و بە ناونیشانی پۆستەکەوە لە ئەنجوومەنی ئاسایشی هەرێمی کوردستان کار دەکات.