هێزە ئەمنییەکانی عەفرین سێ کەس بە تۆمەتی کوشتنی چوار هاونیشتمانییەکەی عەفرین دەستگیردەکەن

 

بزووتنەوەی ئازادی و ئاوەدانکردنەوەی سەر بە فەیلەقی یەکی سوپای نیشتمانیی سووریا، رۆژی سێشەممە 21-03-2023 لە راگەیێندراوێکدا گوتی، دوای بەدواداچوون و کۆکردنەوەی زانیاری، "ئەو تێوەگلاوانەمان دەستگیرکردن کە دوای ئەنجامدانی تاوانەکە هەڵاتبوون."

 

لەو ڤیدیۆیەی کە لەلایەن یەکە ئەمنییەکەوە بڵاوکراوەتەوە، دەردەکەوێت کە سێ کەسیان دەستگیرکردوون، بەگوێرەی دانپێدانەکانیان، دووانیان لەدایکبووی 2000 و ئەوی دیکەیان 2004ـە و هەرسێکیان لە بنەڕەتدا خەڵکی دێرەزوور و ئێستا نیشتەجێی کەمپی جندرێسن. 

 

لە وێنەکانی دیکە کە دواتر بڵاوکرانەوە، دەردەکەوێت کە دوای وەرگرتنی دانپێدانەکانیان، سەریان تاشراوە. 

 

محەممەد جەلال، ئەندامی بزووتنەوەی ئازادی و ئاوەدانکردنەوە گوتی: "ئەمڕۆ کاژێر سێ تۆمەتبارەکانمان دەستگیرکردن و رادەستی لایەنی پەیوەندیدار دەکرێن."

 

ئەو هێزە کە رۆڵی پۆلیس دەگێڕێت، دەڵێت: "بە رۆڵی خۆمان هەڵدەستین بۆ ئەوەی رادەستی لایەنی پەیوەندیداریان بکەین تاوەکو سزای کارەکەیان وەربگرن."

 

هێزە ئەمنییەکە دەشڵێت، هۆشداری بە هەر لەیاسادەرچوویەک دەدەن دژی هەر دەستدرێژییەک بۆ سەر کاروباری خەڵک و بەڵێن بە هاووڵاتیان دەدات "وەکو قەڵخانێک" بۆیان بمێنێتەوە.