لە پشدەر هاونیشتمانییەک کەوتە نێو زێی بچووک و خنکا

 

رۆژی سێشەممە 21-03-2023، بەکر بایز، قایمقامی قەڵادزێ بە رووداوی گوت، دوای نیوەڕۆی ئەمڕۆ باوک و کورێک پێکەوە بە کەڵەک ویستوویانە لە زێی بچووکەوە بۆ گوندەکەی خۆیان بپەڕنەوە، بەڵام لە ئەنجامدا باوکەکە کەوتووەتە نێو ئاوەکە و گیانی لەدەستداوە. 

 

ئەو باوک و کوڕە، وەک قایمقامی قەڵادزێ دەڵێت، خەڵکی گوندی بێخرێن لە بناری ئاسۆس، خەڵکی ئەو گوندانە هەموویان مەلەوانن و زۆرجار بە زێی بچووکدا هاتووچۆ دەکەن، بەڵام دیارە ئەو پیاوە مەلەی نەزانیوە کە کەوتووەتە نێو ئاوەکە کوڕەکەی دەریهێناوە، بەڵام دواتر گیانی لەدەستداوە.

 

ئەو پیاوەی گیانی لەدەستداوە ناوی محەممەد عەبدوڵڵا رەسووڵە. بەکر بایز دەڵێت، لە دایکبووی 1955ـە.  

 

ئەبوبەکر ئیسماعیل، پەیامنێری رووداو لە ئیدارەی راپەرینیش دەڵێت، تەرمی محەممەد عەبدوڵڵا، بردراوەتە نەخۆشخانەی فێرکاری شەهیدانی قەڵادزێ.