ئەنجوومەنی وەزیران لەبارەی سوودمەندانی مووچەی شەهیدان و ئەنفالکراوان بڕیارێک دەدات

 

رۆژی چوارشەممە 20-12-2023، ئەنجوومەنی وەزیرانی هەرێمی کوردستان بە سەپەرشتی مەسروربارزانی، سەرۆکوەزیران و قوباد تاڵەبانی، جێگری سەرۆکوەیزان کۆدەبێتەوە. 

 

بەپێی راگەیێندراوێکی حکومەت، بڕیارە لە کۆبوونەوەکە ئەنجوومەنی وەزیران تاوتوێی دوو بڕگە بکات؛  بڕگەی یەکەم بریتی دەبێت لە خستنەڕوو و خوێندنەوەی یەکەم بۆ مادە و بڕگەکانی رەشنووسی یەکەمی رێنمایی کارکردنی کرێکاری بیانی لە هەرێمی کوردستان. 

 

بڕگەی دووەم، تایبەت دەبێت بە جێبەجێکردنی بڕیاری پێشووی ئەنجوومەنی وەزیران لەبارەی سوودمەندانی مووچەی شەهیدان و ئەنفالکراوان.

 

یاسای چاکسازیی ژمارە 2ـی ساڵی 2020 بڕگەیەکی تێدایە دەڵێت، دەبێت هەر هاووڵاتییەک یەکجار سوودمەند بێت لە خەزێنەی گشتی و یەک مووچەی هەبێت، بەڵام بڕیارە ئەنجوومەنی وەزیران کەسوکاری شەهیدان و ئەنفالکراوان و زیندانییانی سیاسی بەدەربکات لەو بڕگەیە، چونکە هەیە مووچەیەکی زیندانی سیاسی هەیە و باوکیشی شەهیدە مووچەی شەهیدانەی باوکیشی وەردەگرێت، ئەگەر بڕیارەکە بیگرێتەوە دەبێت یەک مووچە وەبگرێت و مووچەی دووەمی دەبڕدرێت.

 

ئەگەر ئەمڕۆ بڕیارەکە لەلایەن ئەنجوومەنی وەزیران پەسەند بکرێت، کەسوکاری شەهیدان و ئەنفالکراوان بەدەر دەکرێن لەو بڕگەیە، واتا ئەگەر کەسێک فەرمانبەرە دەتوانێت مووچەی فەرمانبەرایەتیی خۆی وەربگرێت و ئەگەر باوکی شەهید بووە دەتوانێت مووچەی شەهیدانەی باوکیشی وەربگرێت.