کەشناسیی سلێمانی: لە دوای نیوەڕۆوە کاریگەری بارانبارین زیاتر دەبێت

 

لە ئێوارەی رۆژی یەکشەممە، 19-11-2023، بارانبارین لە هەرێمی کوردستان دەستیپێکرد و بەرەبەیانی رۆژی دووشەممە 20-11-2023 کاریگەرییەکەی لە سنووری پارێزگای هەولێر و دهۆک زیاتر بوو، بە هۆیەوە ئاستی ئاو لە هەندێک شوێن بەرزبووەوە، بەڵام لە سنووری پارێزگای سلێمانی بارانبارین بە کاریگەرییەکی کەمترەوە دەستیپێکرد. 

 

ئاسۆ کەمال، بەڕێوەبەری کەشناسی و بوومەلەرزەزانیی سلێمانی ئەمڕۆ دووشەممە، 20-11-2023، بە تۆڕی میدیایی رووداوی گوت، "لە بەرەبەیانەوە بارانبارین لە سلێمانیش دەستیپێکردووە، تاوەکو ئێستا شەش ملیم باران باریوە و کۆی گشتی بووەتە 56 ملیم، لەکاتێکدا ساڵی رابردوو تاوەکو ئەم کاتە 43 ملیم باران باریبوو."

 

بەگوتەی بەڕێوەبەری کەشناسیی سلێمانی، بارانبارین بەردەوام دەبێت و لە دوانیوەڕۆوە تاوەکو درەنگانی شەو کاریگەرییەکەی لە سنووری پارێزگای سلێمانی زیاتر دەبێت. 

 

ئاسۆ کەمال رایگەیاند، بارانبارین تاوەکو دوانیوەڕۆی سبەی سێشەممە بەردەوام دەبێت و پاشان بەرەو کەمبوونەوە دەچێت؛ دەشڵێت، "لە سنووری گەرمیانیش بارانبارین دەستیپێکردووە و ئاستی ئاو لە هەندێک شوێن بەرزبووەتەوە."

 

بەهۆی مەترسی لافاوەوە ئەمڕۆ دووشەممە لە سەرجەم دامەزراوەکانی حکومەتی هەرێمی کوردستان کرایە پشووی فەرمی. 

 

رۆژی یەکشەممە 19-11-2023 حکومەتی هەرێمی کوردستان لە راگەیێندراوێکدا داوای لە هاونیشتمانییان کرد پابەندی رێکار و رێنوێنییە خزمەتگوزارییەکان بن و نزیک نەبنەوە لە رووبار و ئەو شوێنانەی ئاستی ئاوییان تێدا بەرزدەبێتەوە، لە کاتی ناچاریشدا نەبێت هاتووچۆی رێگەکانی دەرەوە نەکەن.

 

حکومەتی هەرێمی کوردستان پەیامێکی ئاراستەی تیمەکانی بەرگریی شارستانی کرد و داوای کرد لە "ئامادەباشیدا بن بۆ هەر دۆخێکی فریاگوزاری."