لە کرماشان دەست بەسەر 84 کلاشینکۆف و دەمانچەدا گیرا
رووداو دیجیتاڵ
داواکاری گشتیی کرماشان رایگەیاند، لە ئۆپەراسیۆنێکدا لە شاری کرماشان دەست بەسەر 84 چەکی کلاشینکۆف و دەمانچەدا گیرا و چوار کەس بە تۆمەتی بەقاچاخبردنی چەک دەستبەسەر کران.
حەمیدڕەزا کەریمی، داواکاری گشتی و شۆڕشی پارێزگای کرماشانی رۆژهەڵاتی کوردستان، رۆژی پێنجشەممە رایگەیاند، لە ئۆپەراسیۆنێکی هێزە ئەمنییەکاندا لە گەرەکێکی شاری کرماشان تۆڕێکی مامەڵەکردن بە چەک هەڵوەشێنرا و چوار کەس لە ئەندامانی تۆڕەکە دەستگیرکران.
بە گوتەی حەمیدڕەزا کەریمی، لە ئۆپەراسیۆنەکەدا 82 کلاشینکۆف و دوو دەمانچە، هەروەها چوار کیلۆگرام مادەی هۆشبەر لە جۆری تریاک دەستیان بەسەردا گیرا.
داواکاری گشتیی کرماشان رایگەیاند، دەستگیرکراوەکان پەراوی لێکۆڵینەوەیان بۆ کراوەتەوە و دوای لێکۆڵینەوە سەرەتاییەکان، رادەستی لایەنە ئەمنی و دادوەرییەکان کران.