لیستی یەکگرتوو لە هەڵەبجە سکاڵا تۆمار دەکات

 

 

رۆژی هەینی 18-10-2024 کاوە عەلی، سەرۆکی لیستی یەکگرتووی ئیسلامیی کوردستان لە هەڵەبجە لە کۆنگرەیەکی رۆژنامەڤانیدا رایگەیاند، "ئەو پێشێلکارییانەی ئەمڕۆ کرا، پێچەوانەی رێنوێنییەکانی کۆمیسیۆنی هەڵبژاردنەکانی عێراق بوو، سکاڵامان تۆمار کردووە و گەیاندوومانەتە کۆمیسیۆنی عێراق و خودی حاکم عومەر، سکاڵامان لەسەر کۆمیسیۆنی هەڵەبجە تۆمار کردووە کە نەیتوانیوە بە ئەرکی خۆی هەڵبستێت و پیشەییانە کاریان نەکردووە."

 

بە گوتەی کاوە عەلی، ئەوان سکاڵایان لەسەر "یەکێتیی نیشتمانیی کوردستان" و بەڕێوەبەرایەتیی پۆلیس تۆمار کردووە، کە نەیانتوانیوە پڕۆسەکە بە شێوەیەکی دادپەروەرانە و شەفافانە بەڕێوەببەن.

 

لەبارەی ئەو پێشێلکارییانەی بەرامبەر ئەندامەکەیان کراوە، کاوە عەلی گوتی، "هەرچەندە بنەماڵەی ئەو بەڕێزەی ئەو کارەی کردووە بنەماڵەیەکی بەڕێزن، سەردانیشیان کردووین و داوای لێبووردنیان کردووە، بەڵام ئێمە سکاڵای یاسایی و مەدەنیمان لەسەر ئەو کارمەندە تۆمار کردووە."

 

لەبارەی واژۆکردنی ئەنجامی هەڵبژاردنەکان گوتی، "وەکو یەکگرتوو و لایەنێکی دیکە واژۆ لەسەر ئەنجامی هەڵبژاردنەکان ناکەین، چونکە پڕۆسەکە بێلایەنانە نەبوو."

 

سەرۆکی لیستی یەکگرتوو لە هەڵەبجە لە کۆنگرە رۆژنامەوانییەکە داوای لە کۆمیسیۆنی هەڵبژاردنەکانی عێراق کرد، قردێلەی سوود لە سندوقەکان بدەن و بەدواداچوون بۆ پێشێلکارییەکان بکات. گوتیشی، "لەگەڵ کۆمیسیۆن لەسەر خەتین، بۆئەوەی رۆژی یەکشەممە ئەو پێشێلکارییانە دووبارە نەبێتەوە."

 

بە گوتەی کاوە عەلی، ئەمڕۆ لە هەڵەبجە داوای کۆپیی کارتی دەنگدان لە هاونیشتمانییانیش کراوە و "ترسێندراون،" بەوەی کە بەهۆی ئەو کۆپییەوە دەزانن رۆژی دەنگدان دەنگ بە کێ دەدەن، بەڵام دڵنیایی بە دەنگدەران دەدات و دەڵێت، "ئەوەی ئەمڕۆ روویدا و داوا لە دەنگدەران کراوە وێنەی فۆرمی دەنگدان بگرن، بەڵگەیە بۆ ئەوەی کەس نازانێت دەنگ بە کێ دەدەن، بۆیە ئازایانە و ئازادانە دەنگ بدەن."

 

کاژێر 07:00ی بەیانیی ئەمڕۆ دەنگدانی تایبەت بۆ خولی شەشەمی پەرلەمانی کوردستان دەستیپێکرد و تاوەکو کاژێر 06:00ی ئێوارە بەردەوام بوو. جگە لە پارێزگای هەڵەبجە لە پارێزگاکانی دیکە دەنگدان بە شێوەیەکی ئاسایی بەڕێوەچوو.

 

لە پارێزگای هەڵەبجە گرژی دروستبوو بەهۆی ئەوەی بەشێک لە هێزە ئەمنییەکان مۆبایلیان بردبووە ژوورەوە و وێنەی فۆرمی دەنگدانی خۆیان دەگرت.