کاروباری کۆمەڵایەتی: 24 کەس کە لە خانەی بێسەرپەرشتان تەمەنیان بووەتە 18 ساڵ دادەمەزرێن

 

 

رۆژی چوارشەممە 17-01-2024 ئاریان ئەحمەد، گوتەبێژی وەزارەتی کار و کاروباری کۆمەڵایەتی بە تۆڕی میدیایی رووداوی گوت، کوێستان محەممەد، وەزیری کار و کاروباری کۆمەڵایەتی داوای دامەزراندنی 24 مێرمنداڵی کردبوو کە تەمەنیان لە خانەکانی بێسەرپەرشتان بووەتە 18 ساڵ بۆ ئەوەی بە گرێبەست دابمەزرێن. مەسرور بارزانی، سەرۆکی ئەنجوومەنی وەزیرانیش رەزامەندی لەسەر نووسراوەکە دەربڕی و بڕیاری دامەزراندنیان دەرچووە.

 

بە گوتەی گوتەبێژی وەزارەتی کار و کاروباری کۆمەڵایەتی، چوار خانەی بێسەرپەرشتان لە هەرێمی کوردستان هەن کە ئەوانیش لە هەولێر، سلێمانی، دهۆک و گەرمیانن. لە سەرجەم ئەو چوار خانەیە تەنیا 24 کەس تەمەنیان بووەتە 18 ساڵ و بڕیاری دامەزراندن بۆ هەموویان دەرچووە. 

 

ئاریان ئەحمەد رایگەیاند، ئەو 24 مێرمنداڵە هەشتیان لە خانەی بێ سەرپەرشتانی هەولێر، هەشت لە سلێمانی، حەوت لە دهۆک و ئەوی دیکە لە گەرمیانە.

 

رۆژی 10-08-2023 کوێستان محەممەد، وەزیری کار و کاروباری کۆمەڵایەتی، نووسراوێکی ئاراستەی مەسرور بارزانی، سەرۆکوەزیران کرد و داوایکرد ئەو کەسانەی لە خانەی بێسەرپەرشتانن و تەمەنیان بووەتە 18 ساڵ دابمەزرێن، ئەوەش بە مەبەستی بەگەڕخستنی تواناکانیان و پاڵپشتی و هاندانیان.