باوکی گەنجێکی سەردەشت کە لە ئیتاڵیا گیانی لەدەستدا: ئاواتمانە تەرمەکەی ببینینەوە

 

بەپێی ئەو زانیارییانەی بە رووداو گەیشتووە، پێشەوا ئەحمەدی، تەمەن 16 ساڵ، خەڵکی گوندێ بێژوێ-ی سەر بە شاری سەردەشت بووە و رۆژی 06-10-2022 لە رۆژهەڵاتی کوردستانەوە چووەتە تورکیا و لەوێشەوە چووەتە ئیتاڵیا.

 

حوسێن ئەحمەدی، باوکی پێشەوا دەڵێ: دەیویست بچێت لە ئەوروپا بخوێنێت، بەڵام کاتێک گەیشتوونەتە کەناراوەکانی ئیتاڵیا و لە کەشتییەکە دابەزیون، دڵی لە لێدان کەوتووە و گیانی لەدەستداوە. 

 

دایکی پێشەوا گوتی: "پارچە زەوییەکم هەبوو بۆم فرۆشت، قەرزی بانکیم بۆ وەرگرت، 20 ملیۆن تمەنم لە خەڵکی بۆی کۆکردەوە، هیچم نەماوە، هەرچی هەمبوو بۆم کۆکردەوە بۆ ئەوەی بینرێمە دەرەوە، بۆ ئەوەی بەبۆنەیەوە بحەسێمەوە." 

 

وەک دایکی دەڵێت: "پیشەوا دەیگوت دەستی خەڵکی دەگرم و پارە بۆ هەژاران دەنێرمەوە، نەمزانی ئاوای لێهات، نەمزانی تەرمەکەی دەگەڕێتەوە. دەیگوت دایە دەخوێنم و پارە پەیدا دەکەم و بۆ هەژارانی دەنێرمەوە."

 

چەند ساڵێکە کۆچکردنی خەڵک، بەتایبەت لاوان، لە شاری سەردەشتەوە بۆ وڵاتانی ئەوروپا بووەتە دیاردە، دۆخی خراپی ئابووری و بێکاری، هۆکاری سەرەکی ئەم دیاردەیەن.

 

کەمال حوسێن پوور، نوێنەری سەردەشت و پیرانشار لە پەرلەمانی ئێران، رۆژی 15-01-2022 گوتی: بۆ پەرەپێدانی ئابووری ئەگەر کەڵک لە سنوورەکان وەربگیرێت، چیدیکە هیچ گەنجێک ناچار نابێت کۆچ بکات. 

 

ژیانی ئابووری سەردەشت ساڵانی زۆرتر گرێدراوی دەروازە سنوورییە نافەرمی و نیمچە فەرمییەکان بوو، بەڵام ئەم دەروازانە ساڵی 2017 بە بڕیاری حکومەتی ئێران داخران و سەرەڕای داواکاریی خەڵکی ناوچەکە، دەروازەکان نەکراونەتەوە. 

 

کەمال حوسێن پوور، 31-10-2020 گوتی: کۆچی خەڵکی سەردەشت بۆ دەرەوەی وڵات دەستیپێکردووە و لە ماوەی 5 مانگدا زیاتر لە هەزار کەس کۆچیان کردووە.

 

لە رێگەی گەیشتن بە ئەوروپا، تائێستا زۆر کەس گیانیان لەدەستداوە. گیان لەدەستدانی خێزانی رەسوول ئێران نەژاد، (خۆی، هاوژینەکەی، کچەکەی و دوو منداڵەکەی) لە مانگی نۆڤەمبەری ساڵی 2020دا دەنگدانەوەی زۆری هەبوو.