تورکیا و پەکەکە ئاماری نوێی شەڕی نێوانیان بڵاودەکەنەوە

 

 

رۆژی هەینی 15-11-2024 وەزارەتی بەرگریی تورکیا لە هەژماری خۆی لە تۆڕی کۆمەڵایەتیی ئێکس، گیانلەدەستدانی 9 گەریلای پەکەکەی لە ناوچەکانی گارە و خواکوڕک لە هەرێمی کوردستان راگەیاند.

 

وەزارەتی بەرگریی تورکیا دەڵێت، ئۆپەراسیۆنەکانیان لە هەموو هەلومەرجێکدا بەردەوام دەبن.

 

هەر ئەمڕۆ، ناوەندی چاپەمەنی و راگەیاندنی هەپەگە بڵاویکردەوە، لە سێ رۆژی رابردوودا هێرشیان کردووەتە سەر هێزەکانی سوپای تورکیا لە ناوچەی زاپ لە هەرێمی کوردستان و لە ئەنجامدا 3 سەربازی تورکیا کوژراون.

 

ئەم شەڕ و پێکدادانە لە چوارچێوەی ئۆپەراسیۆنێکدایە تورکیا ناوی ناوە "چنگ- قوفڵ" کە بەرەبەیانی رۆژی 18ـی نیسانی 2022 لە ناوچەکانی ئاڤاشین، مەتین و زاپ لە خاکی هەرێمی کوردستان بۆ سەر پێگەکانی پەکەکە دەستیپێکرد.