پۆلیسی راپەڕین: لە گوندێکی هەڵشۆ کەسێک کوژرا

 

شەوی هەینی 15-7-2022، شۆڕش ئیسماعیل، گوتەبێژی پۆلیسی راپەڕین بە تۆڕی میدیایی رووداوی راگەیاند، کەمێک پێش ئێستا لە گوندی تووەڕەشان-ی سەر بە ناحیەی هەڵشۆ "هاونیشتمانییەک بەناوی (م. م.ر) لەدایکبووی ساڵی 1982 پیشەی پۆلیس لە بەرگریی فریاکەوتن کوژراوە."

 

گوتەبێژی پۆلیسی راپەڕین دەڵێت، "شوێنەواری گوللـەی جۆری کڵاشینکۆف بە سەرییەوە دیارە و لە دادپزیشکی توێکاریی بۆ تەرمەکەی دەکرێت."

 

پۆلیسی راپەڕین گوتی کە دوای رووداوەکە هێزەکانیان گەیشتوونەتە شوێنی رووداوەکە و دواتر زانیاریی لەبارەی هۆکاری رووداوەکە بڵاودەکەنەوە. 

 

گوتەبێژی پۆلیسی راپەڕین ئاماژە بەوە دەدات کە "بە دڵنیاییەوە رووداوەکە تاوانکارییە و لە لێکۆڵینەوەداین تاوەکو بزانین تۆمەتباری رووداوەکە کێیە، بۆ ئەوەی بە زووترین کات دەستگیری بکەین."

 

رۆژی پێنجشەممە 14-7-2022 لە قەڵادزێ هاونیشتمانییەکی تەمەن 48 ساڵ بە تەزووی کارەبا گیانی لەدەستدا. کە بە گوتەی هاوژینەکەی "لەماڵەوە سەرقاڵی چاککردنی پلاکێک بووە و دواتر دەستی بەر تەزووی کارەبا کەوتووە و دەستبەجێ گیانی لەدەستداوە."