ئەو ئۆتۆمبێلانەی راکان جبووری بە دەستەی دەستپاکیی کەرکووکی دابوون، بردراونەتە شوێنێکی نادیار

 

دیلان غەفوور، ئەندامی پەرلەمانی عێراق و نوێنەری کەرکووک لەو بارەیەوە بە تۆڕی میدیایی رووداوی راگەیاند "بۆ پەردەپۆشکردنی دۆسیەی پێدانی ئۆتۆمبێل لەلایەن راکان جبووری بە دەستەی دەستپاکیی کەرکووک، ئێوارەی دوێنێ بەیەک کاژێر دوای بڵاوکردنەوەی نووسراوێکمان لەسەر ئەو دۆسییەیە و جوڵاندنی بۆ رای گشتی، بەپەلە هەشت ئۆتۆمبێل لە گەراجی دەستەی دەستپاکییەوە گوازرانەوە شوێنێکی نادیار."

 

دیلان غەفوور گوتیشی، بۆ ئاشکراکردنی ئەو دۆسیەیە "کە بۆنی گەندەڵیی لێدێت" چوونەتە دادگە و سکاڵایان تۆمارکردووە.

 

نوێنەرەکەی کەرکووک لە پەرلەمانی عێراق جەختی کردەوە لەوەی؛ داوای لێدانەوەی کامێراکانی چاودێرییان کردووە و، "بەپێی تۆماری کامێراکان، دەردەکەوێت ئێوارەی دوێنێ هەشت ئۆتۆمبێل لە دەستەی دەستپاکییەوە دەگوازرێنەوە شوێنێکی نادیار، بەپێی زانیارییەکان راکان جبووری رێگەی نەداوە ئۆتۆمبێلەکان ببردرێنە بینای پارێزگا."

 

لە نووسراوێکدا کە بەرواری 13ـی ئەم مانگەی بەسەرەوەیە، ئەو پەرلەمانتارە داوای کردووە لێکۆڵینەوەیەکی بەپەلە لە نووسینگەی کەرکووکی سەر بە دەستەی دەستپاکی بکرێت "بەهۆی قۆستنەوەی رۆڵی چاودێرییان" لە بەرژەوەندیی خۆیاندا.

  

لە نووسراوەکەدا پەرلەمانتارەکە دەڵێ دەستەی دەستپاکیی کەرکووک سەرپێچیی یاسایی کردووە بە وەرگرتنی چوار ئۆتۆمبێلی پارێزگای کەرکووک، هەروەها 9 ئۆتۆمبێلی تایبەت بە ئەندازیارانی پڕۆژەکان. بەو هۆیەوە داوا دەکات بەزوترین کات سەرپێچیکاران سزا بدرێن.

 

بەپێی نووسراوەکە، ئەو ئۆتۆمبێلانە بەبێ رەزامەندیی یاسایی دراون و دەستەی دەستپاکیش بەپێی یاسا نابێت هیچ موڵکێک لە هیچ لایەنێک وەربگرێت.