ژان ئیڤ لودریان: فەرەنسا بۆ پشتیوانی گەلی كوردستان دەمێنێتەوە

رۆژی سێشەممە 15-1-2019، لە سەلاحەدین سەرۆك بارزانی پێشوازی لە ژان ئیڤ لودریان، وەزیری دەرەوەی فەرەنسا و شاندێكی یاوەری كرد.

لە دیدارەكەدا وەزیری دەرەوەی فەرەنسا، خۆشحاڵیی خۆی بۆ دیداری لەگەڵ سەرۆك بارزانی راگەیاند و وێڕای ئاماژەدان بە كەشوهەوای نوێ لە عێراق و ناوچەكە، ''پێزانینی بۆ قەربانیدانی گەلی كوردستان لە شەڕی دژی تیرۆریستانی داعش هەبوو و جەختیشی لەوە كردەوە كە لەپێناو بەدیهاتنی سەقامگیری و دەرنەكەوتنەی تیرۆر لە عێراق پێویستە رێز لە پێكهاتەكانی دەوڵەتی عێراق و بە تایبەت رێز لە هەرێمی كوردستان و پێگە و كاریگەرییەكەی بگیرێت''.

وەزیری دەرەوەی فەرەنسا راشیگەیاند، وڵاتەكەی لە پشتیوانی گەلی كوردستان دەمێنێتەوە و هاوكاریی سیاسی و سەربازی و پەیوەندییە فەرهەنگی و ئابوورییەكانی لەگەڵ كوردستان پەرە پێدەدات و خوازیاری ئەوەیشە كە لە ئاوەدانكردنەوەی عێراق بەشداربێت.

بەپێی راگەیێندراوێکی کۆبوونەوەکە، سەرۆك بارزانی بەگەرمی بەخێرهاتنی وەزیری دەرەوەی فەرەنسای كرد و سوپاسی گەل و سەرۆك و حكومەتی فەرەنسا و وەزیری دەرەوەی فەرەنسای كرد كە دۆست و پشتیوانی گەلی كوردستان بوونە و ئاماژەیشی بە سەردانی سەرۆك فرانسوا ئۆلاند بۆ كوردستان كرد كە لە كاتی تەنگانەدا سەردانی كوردستانی كرد و ئەوەی دووپاتكردەوە كە فەرەنسا دۆستێكی مەزنی گەلی كوردستانە.

لەبارەی پەیوەندییەكانی هەرێمی كوردستان و فەرەنسا سەرۆك بارزانی رایگەیاند، كە خۆشحاڵە بەو پەیوەندییانە و هیچ سنوورێك بۆ دۆستایەتی و پەیوەندیی لەنێوان گەلی كوردستان و گەلی فەرەنسادا نییە.

پەیوەندییەكانی هەرێمی كوردستان و بەغدا تەوەرێكی دیكەی ئەو دیدارە بوو و هەردوولا جەختیان لەوە كردەوە، كەشوهەوایەكی نوێ و متمانە و بارودۆخێكی ئەرێنی لە پەیوەندییەكانی نێوان هەرێمی کوردستان و بەغدا هاتووەتە ئاراوە و سەرۆك بارزانی هیوای ئەوەی خواست كە ئەو گرفتانەی كە لەنێوان هەردوولا ماوەن لەڕێگەی دیالۆگ و لێكتێگەییشتن چارەسەربكرێت. 

هەروەها ئاماژەیشی بەوەدا كە راستە داعش لەڕووی سەربازی تێكشكاوە، بەڵام پێویستە ئەو هۆكارانەی كە بوونە هۆی سەرهەڵدانی داعش نەمێنن بۆ ئەوەی جارێكی تر داعش سەرهەڵنەداتەوە.

لەبارەی چارەنووسی گەلی كورد لە سووریا هەردوولا نیگەرانییەكانی خۆیان نیشاندا و ئەوەیان دووپاتكردەوە كە پێشهات و گۆڕانكارییەكانی ناو سووریا نابێ ببێتە هۆی ئەوەی گەلی كورد و هاووڵاتیانی كورد لە سووریا باجەكەی بدەن. 

پەیوەست بە بارودۆخی گەلی كورد لە سووریا و چارەسەركردنی گرفتەكان سەرۆك بارزانی بۆچوون و پێشنیارەكانی خۆی بۆ وەزیری دەرەوەی فەرەنسا خستەڕوو.

رۆژی دووشەممە، 14-1-2019 ژان ئیڤ لودریان، وەزیری ئەوروپا و پەیوەندییەکانی دەرەوەی فەرەنسا گەیشتە بەغدا و دوای ئەنجامدانی چەند کۆبوونەوەیەک گەیشتە هەولێر و لەلایەن سەرۆکوەزیران نێچیرڤان بارزانی پێشوازی لێکرا. 

لە سەردانەکەی بۆ هەولێر، لودریان لەگەڵ هەریەکە لە سەرۆک بارزانی، نێچیرڤان بارزانی و مەسروور بارزانی کۆبووەوە.