لە مێردین خاوەن ماڵ و کرێچییەک لەسەر کرێی خانوو دەبێتە شەڕیان و شەش کەس دەستگیر دەکرێن

 

 

رۆژی چوارشەممە 6ی ئەیلوولی 2023 لە گەڕەکی یەنکەنت لە شارۆچكەی قۆسەری مێردین، لەسەر کرێی خانوو دەمەقاڵی لەنێوان خاوەن ماڵێک و کرێچییەکەیدا روویدا، کە فەرمانبەری پۆلیسە و دواتر بووەتە شەڕیان.

 

لە شەڕەکەدا کەسوکاری خاوەن ماڵەکە بەشدار بوون و لە کرێچییەکەیان دا، کە پۆلیسە و، دەستیان بەسەر دەمانچەکەیدا گرت. بەهۆی شەڕەکە و بە تۆمەتی دەستگرتن بەسەر دەمانچەی پۆلیسەکە، بە خاوەن ماڵەکەوە شەش کەس دەستبەسەر کران.

 

دوای گرتنەبەری رێکاری یاسایی، شەش کەسە دەستبەسەرکراوەکە رەوانەی دادگە کران و بە بڕیاری دادگە دەستگیر کران.

 

کرێچییەکە لە گوتەکانیدا ئاماژەی بەوە داوە، بە پاساوی ئەوەی کرێی نەداوە، خاوەن ماڵەکە ویستوویەتی لە ماڵەکەی بیکاتە دەرەوە و پەیامی هەڕەشەئامێز بۆی نێردراوە، هەروەها براکانی خاوەن ماڵەکە رێگەیان لێگرتووە و هەڕەشەیان لێکردووە.

 

کرێچییەکە دەڵێت، بەهۆی گوشاری خاوەن ماڵەکەوە پێشتر لە 18ی ئابی ئەمساڵ چووەتە بنکەی پۆلیس و سکاڵای لەسەر خاوەن ماڵەکە تۆمار کردووە، رۆژی 6ی ئەیلوولیش کە شەڕەکە روویدا، بۆئەوەی بچێتە سەر کار لە ماڵ چووەتە دەرەوە، بەڵام لەنێو بیناکەدا خاوەن ماڵەکە و ژمارەیەک لە کەسوکارەکانی لێیان داوە و دەمانچەکەشیان لێ سەندووە.