چوونی خەڵک بۆ چەندین ناوچەی شرنەخ قەدەخە کرا

 

 

بەگوێرەی راگەیێندراوێک، کە لەلایەن پارێزگای شرنەخەوە بڵاوکراوەتەوە، ناوچەکانی چیای جودی، بەستا، چیای گابار و چەند ناوچەیەکی دیکە لە سنووری ئەو پارێزگایە وەکو "ناوچەی ئەمنیی تایبەت" ناسێندراون و بۆ ماوەی 15 رۆژ چوون و هاتنی خەڵک بۆ ئەو ناوچانە قەدەخە کراوە.

 

بڕیاری قەدەخەکردنەکە لە سبەی پێنجشەممە 15ی ئابەوە دەستپێدەکات و تاوەکو 29ی ئاب بەردەوام دەبێت.

 

ئەو ناوچانەی بەپێی بڕیاری پارێزگا قەدەخە کراون بریتین لە، "ناوچەی بەستا، چیای جودی و گابار لە سنووری ناوەندی شاری شرنەخ و شارۆچکەکانی جزیر، سلۆپی و باسا و 11 ناوچەی دیکە لە سنووری شارۆچکەکانی ئەلکێ و قلەبان."

 

پارێزگەی شرنەخ رایگەیاندووە، بە مەبەستی پاراستنی ئاسایشی نەتەوەیی، دەستەبەرکردنی سەلامەتیی گشتی، رێگری لە تاوان و پاراستنی ماف و ئازادییەکانی دیکە، ئەو ناوچانە وەکو ناوچەی ئەمنیی تایبەت راگەیێندراون و داوای لە خەڵکی کردووە، بۆ پاراستنی سەلامەتیی خۆیان پابەندی بڕیارەکە بن و سەردانی ئەو ناوچانە نەکەن.

 

سوپای تورکیا لەم دواییانەدا ئۆپەراسیۆنە سەربازییەکانی دژ بە گەریلاکانی پەکەکە لەسەر سنووری باکوور و باشووری کوردستان و چەند پارێزگایەکی دیکەی باکووری کوردستان زیاد کردووە، بەو هۆیەوە قەدەخەی هاتووچۆ و ناوچەی ئەمنیی تایبەت لە ناوچەکەدا رادەگەیێندرێت.