هاتنی زیارەتکارانی ئێرانی لە دەروازەکانی حاجی ئۆمەران و باشماخەوە دەستپێدەکات

 

رۆژی دووشەممە 14-08-2023 عەبدوڵڵا ئاکرەیی، بەرپرسی پەیوەندییەکانی ھەرێمی کوردستان و ئێران بە تۆڕی میدیایی رووداوی راگەیاند، "لە دوایین کۆبوونەوە لەنێوان پارێزگاری هەولێر و ورمێ، یەکەم تەوەر باسی چلەی ئیمام حوسێن کرا کە پار ئەوانەی لە دەروازەکانی هەرێمی کوردستانەوە سەردانی کەربەلایان کرد زیاتر لە 50 هەزار کەس بوون. حکومەتی ئیران لە کاری حکومەتی هەرێمی کوردستان زۆر رازی بوو، چونکە زیارەتکارانیان تووشی هیچ کێشەیەک نەبوون؛ بۆیە بۆ ئەمساڵ پێشبینی هاتنی زیارەتکاری زیاتر دەکرێت".

 

بەگوتەی بەرپرسی پەیوەندییەکانی ھەرێمی کوردستان و ئێران، "دوای ئەوەی بڵاوبووەوە رێگەی هەرێمی کوردستان سەلامەتە، پێشبینی دەکرێت ئەمساڵ لە رێگەی دەروازەکانی حاجی ئۆمەران و باشماخەوە بەتایبەت حاجی ئۆمەران 500 هەزار زیارەتکار سەردانی کەربەلا بکەن بۆ بەشداریکردن لە چلەی ئیمام حوسێن، چونکە پێنج بۆ شەش پارێزگا لە حاجی ئۆمەرانەوە نزیکن وەکو ورمێ، تەورێز، قەزوین، مازندەران و زەنجان."

 

وەزارەتی ناوخۆی هەرێمی کوردستان ئامادەکاری بۆ پێشوازی لە زیارەتکاران کردووە. عەبدوڵڵا ئاکرەیی دەڵێت، "وەزارەتی ناوخۆ کۆمیتەیەکی 12 کەسی پێکهێناوە بۆ ئەوەی هەموو ئامادەکارییەک بکرێت. ئەو کۆمیتەیە نزیکەی 12 لیژنەی پێکهانەوە بۆ ئەوەی بە رێکوپێکی پێشوازی لە زیارەتکاران بکرێت و رێنماییان پێ بدرێت و هەر پرسیارێکیان هەبوو، هاوکاری بکرێن."

 

مەراسیمی چلەی ماتەمینی ئیمام حوسێن هەموو ساڵێک لە 20ـی مانگی سەفەر (مانگی سەفەر بەپێی رۆژژمێری هیجری لەدوای مانگی موحەرەمەوە دێت) لە عێراق و چەند وڵاتێکی دیکە بەڕێوەدەچێت؛ سەدان هەزار لە باوەڕدارانی شیعە سەردانی مەزارگەی ئیمام حوسێن لە کەربەلا دەکەن و بە چەندین شێواز ماتەمینی دەگێڕن. 

 

ئیمام حوسێن، کچەزای محەممەد، پێغەمبەری ئیسلام (دروودی خودای لەسەر بێت) لە شاری کەربەلا، لەگەڵ خێزان و دەیان لە کەسوکار و لایەنگرانی لە ساڵی 680ـی زایینی و لەسەر دەستی لایەنگرانی یەزیدی کوڕی مەعاوییە، خەلیفەی ئەمەوییەکان کوژرا.