ساڵی نوێی خوێندن لە هەرێمی کوردستان دەستیپێکرد

نازەنین گۆران
رووداو دیجیتاڵ

ئەمڕۆ ساڵی خوێندنی 2023-2024 لە هەرێمی کوردستان دەستیپێکرد و بەگوێرەی ئامارەکانی وەزارەتی پەروەردەی هەرێمی کوردستان بۆ رووداو، بۆ ئەم ساڵی خوێندن یەک ملیۆن و 633 هەزار و 125 قوتابی لە هەرێمی کوردستاندا هەن، کە زۆرترینیان لە هەولێرن.
 
قوتابییەکان بەم جۆرە بەسەر پارێزگا و ئیدارە سەربەخۆکاندا دابەشبوون: هەولێر 493 هەزار و 669 قوتابی؛ سلێمانی 363 هەزار و 258 قوتابی؛ دهۆک 407 هەزار و 211 قوتابی؛ هەڵەبجە 24 هەزار و 635 قوتابی؛ ئیدارەی سەربەخۆی گەرمیان 75 هەزار 877 قوتابی؛ ئیدارەی سەربەخۆی راپەڕین 89 هەزار و 955 قوتابی؛ ئیدارەی سەربەخۆی سۆران 79 هەزار و 435 و ئیدارەی سەربەخۆی زاخۆ 91 هەزار و 730 قوتابی؛ بەڕێوەبەرایەتییەکانی سەر بە وەزارەت 7355. 
 
ئەم ئامارە لەکاتێکدایە بەگوتەی ئالان حەمەسەعید، وەزیری پەروەردەی هەرێمی کوردستان، ژمارەی قوتابیان لە سەرجەم قوتابخانە حکومی و ناحکومییەکان بۆ ئەمساڵی خوێندن (2023 - 2024)، ملیۆنێک و 921 هەزار و 931 قوتابییە.
 
بۆ ساڵی خوێندنی 2023-2024، لە هەرێمی کوردستان و خوێندنی کوردی لە کەرکووک 152 هەزار و 890 مامۆستا هەن کە بەشێکیان هەمیشەیی، وانەبێژ و بەشێکی دیکەیان گرێبەستی حکومی و ناحکومین. دابەشبوونی مامۆستایانی وانەبێژ و هەمیشەیی بەم شێوەیەیە: پارێزگای هەولێر 31 هەزار و 686 مامۆستای هەمیشەیی و حەوت هەزار و 319 وانەبێژ؛ پارێزگای سلێمانی 29 هەزار و 401  هەمیشەیی و هەشت هەزار و 434 مامۆستای وانەبێژ؛ دهۆک 21 هەزار و 939 هەمیشەیی و 11 هەزار و 380 مامۆستای وانەبێژ؛ هەڵەبجە سێ هەزار و 823 هەمیشەیی و 542 وانەبێژ. 

 

 
 
ژمارەی مامۆستایانی هەمیشەیی و وانەبێژ لە ئیدارە سەربەخۆکان و خوێندنی کوردی لە کەرکووک بەمشێوەیە: گەرمیان هەشت هەزار و 576 هەمیشەیی و دوو هەزار و 936 مامۆستای وانەبێژ؛ خوێندنی کوردی کەرکووک پێنج هەزار و 927 هەمیشەیی و هەزار و 61 وانەبێژ؛ لە ئیدارەی سەربەخۆی سۆران 9 هەزار و 126 هەمیشەیی و سێ هەزار و 863 وانەبێژ؛ ئیدارەی سەربەخۆی راپەڕین شەش هەزار و 163 هەمیشەیی و هەزار و 769 وانەبێژ؛ لە ئیدارەی سەربەخۆی زاخۆ شەش هەزار و 342 هەمیشەیی و دوو هەزار و 12 مامۆستای وانەبێژ هەن.
 
بەپێی ئامارەکانی وەزارەتی پەروەردە بێت، لە هەرێمی کوردستان شەش هەزار و 811 ناوەندی خوێندن هەن کە پێکهاتوون لە باخچەی ساوایان، قوتابخانەی بنەڕەتی، دواناوەندی، ئامادەیی، فێرکردنی خێرا، پیشەیی و کۆمەڵگە و بەرێوەبەرایەتییە گشتییەکانی سەر بە دیوانی وەزارەت و دابەشبوونەکەش بەمجۆرەیە: لە پارێزگای هەولێر هەزار و 619 ناوەندی خوێندن؛ سلێمانی هەزار و 393؛ دهۆک هەزار و 465؛ هەڵەبجە 148؛ گەرمیان 388، خوێندنی کوردی کەرکووک 537؛ سۆران 647، راپەڕین 370؛ زاخۆ 206 و بەرێوەبەرایەتییە گشتییەکانی سەر بە دیوانی وەزارەت 38 دانە.