باوکی ئەو کوڕەی لە بنەسڵاوە کوژرا: کێشەی لەگەڵ کەس نەبوو

 

شایەتحاڵێکی دۆزینەوەی تەرمەکە بەمەرجی نەهێنانی ناوی قسەی بۆ رووداو کرد، گوتی، "کاژێر 10:30 خولەک هاتینە ئێرە، ئۆتۆمبێلێکمان لێرە بینی، هاتین سەیرمانکرد، کەسی لێ نەبوو، منیش سوویچەکەم هێنا، سندووقەکەم کردەوە و بینیمان نەفەرێکی تێدایە و بەتانی لەسەرە، هاوڕێکەم ترسا و هەڵات، منیش بەتانییەکەم لادا، دەموچاوی کەسێکم بینی، چاوی کرابووەوە، منیش ترسام و سویچەکەم خستەوە سەر جێگای خۆی و دەرچووم".

 

عەلی سەباح سوارە، تەمەنی 29 ساڵ و قوتابی قۆناخی یەکەمی پەیمانگە بوو لە بەشی کارگێڕیی یاسا. ئەو لە کۆمپانیایەکی خۆراک کاری دەکرد، جی پی ئێسی ئۆتۆمبێلەکەی کە هی کۆمپانیاکە بووە، دەریدەخات کاژێر 02:31 خولەکی بەرەبەیانی هەینی لە ماڵ دەرچووە.

 

سەباح سوارە، باوکی عەلییە و بە رووداوی گوت، کاتێک لە خەو هەستاوە پرسیاری کوڕەکەی کردووە، بەڵام پێیان گوتووە، مۆبایلەکەی داخراوە. دواتر چووەتە نوێژی هەینی و کە گەڕاوەتەوە پرسیاری کردووە، بەڵام هەر مۆبایلەکەی داخراوە. ئەو دەڵێت، "هیچ کێشەیەکی لەگەڵ کەس نەبوو و کوڕێکی بە ئەدەب بوو".

 

تەرمەکەی عەلی کاتێک لەنێو ئۆتۆمبێلەکەی دەدۆزرێتەوە کە سێ گوللە بە جەستەیەوە نرابوو. ئەمڕۆ شەممە 13-3 ئاسایشی هەولێر رایگەیاند، کەسێکیان بە تۆمەتی کوشتنی عەلی و دوو کەس کە هاوکاریی بکوژەکەیان کردووە و دانشتووی بنەسڵاوەن دەستگیر کردووە.

 

تۆمەتبارەکانی ئاسایش دەستگیری کردووە، دانیان بەوەدا ناوە لەسەر کێشەی کۆمەڵاتی ئەو تاوانەیان ئەنجامداوە. "بەپێی زانیارییەکانی رووداو، جی پی ئێسی تۆمبێلی جۆری نیسان سێنترای عەلی دەریخستووە کاتێک لە ماڵ دەرچووە لە بنەسڵاوە وپێش چ خانوویێک رایگرتووە."