پارێزەری حوکمدراوانی بادینان: پێنج حوکمدراو ئازاد دەکرێن

 

 

ئەمڕۆ دووشەممە 12-12-2022، بەشدار حەسەن، ئەندامی تیمی پارێزەرانی خۆبەخشی حوکمدراوانی بادینان بە تۆڕی میدیایی رووداوی راگەیاند، "ئەمڕۆ دادگەی تاوانی 2ی هەولێر بڕیاریدا بە ئازادکردنی چوار چالاکڤانی شیلادزێ."

 

بە گوتەی بەشدار حەسەن، "ئەو چالاکڤانانە لە 08-12-2020 دوو ساڵ سزای زیندانییان بۆ دەرکرا و تەواویان کردووە و کەمێکی دیکە لە چاکسازیی گەورانی هەولێر ئازاد دەکرێن."

 

ئەو ئەندامەی تیمی پارێزەرانی خۆبەخشی حوکمدراوانی بادینان گوتیشی، "ئەو کەسانە بە مادەی 1ی یاسای ژمارە 21ی ساڵی 2003ی پەرلەمانی کوردستان سزادراون کە تایبەتە بە تێکدانی ئاسایشی نیشتمانی."

 

لە مادەی 1ی یاسای ژمارە 21ی ساڵی 2003دا هاتووە، "هەر کەسێک بە دەستی ئەنقەست و بە هەر شێوەیەک لە کارێکدا تێوەبگلێت بە مەبەستی زیانگەیاندن بە ئاسایش و سەقامگیری و سەروەریی دامودەزگاکانی هەرێمی کوردستانی عێراق و ببێتە هۆی کەوتنەوەی ئەو زیانە، بە بەندکردنی تاهەتایی یان کاتی، سزا دەدرێت."

 

 

یوسف شەریف ئیبراهیم، لەدایکبووی 2001

مەحموود ناجی سدیق، لەدایکبووی 1996

کۆڤان تارق جبرائیل، لەدایکبووی 1996

ئەمجەد یوسف مستەفا، لەدایکبووی 1989

نێچیرڤان بەدیع حاجی، لەدایکبووی 1993

 

ئەو کەسانەی ئەمڕۆ ئازاد دەکرێن بریتین لە یوسف شەریف، مەحموود ناجی، کۆڤان تارق، نێچیرڤان بەدیع. پارێزەری حوکمدراوانی بادینان گوتیشی، سبەینێش حوکمدراوەکەی دیکەی شیلادزێ بەناوی ئەمجەد یوسف مستەفا ئازاد دەکرێت.