لەسەر هەڵاتن لە چاکسازی ژنان و منداڵانی هەولێر لێکۆڵینەوە لەگەڵ 9 کەس دەکرێت

 

رۆیژ یەکشەممە 12-3-2023، ئیحسان عەبدولڕەحمان، بەڕێوەبەری گشتیی چاکسازییەکانی هەرێمی کوردستان لەبارەی دوایین زانیارییەکانی پەیوەست بە کەیسی هەڵاتنی دوو راگیراو لە چاکسازیی ژنان و منداڵانی هەولێر و هەوڵی هەڵاتنی چوار کەسی دیکە بە تۆڕی میدیایی رووداوی راگەیاند، "دوای رووداوەکە لیژنەیەکی لێکۆڵێنەوە لە نوێنەرانی هەردوو وەزارەتەکانی کار و کاروباری کۆمەڵایەتی و ناوخۆ لەسەر ئەو کەیسە دروستکراوە بۆ ئەوەی لێکۆڵینەوە لە چۆنێتی هەڵاتنی ئەو راگیراوانە بکات." 

 

وەک ئیحسان عەبدولڕەحمان دەڵێت، "لێکۆڵینەوەی سەرەتایی لەگەڵ نۆ کەس کراوە و دەرکەوتووە لە کاتی رووداوەکەدا نووستوون، بەڵام دوای لێکۆڵینەوە بە کەفالەت ئازادکراون." 

 

روونیشیکردەوە، "داواکاری گشتیش سکاڵای لەسەر ئەو کەیسە جووڵاندووە و ئێستا چاوەڕوانی دادگەی کارگێڕی دەکەین بۆ ئەوەی بڕیار لەبارەی ئەو کەیسەوە بدرێت."

 

شەوی یەکشەممە 5ـی ئاداری 2023، شەش کەس کە بەپێی وەزارەتی کار و کاروباری کۆمەڵایەتی ئەو کەسانە لە گرتووخانەی چاکسازیی ژنان و منداڵانی هەولێر راگیرابوون، هەوڵی هەڵاتنیان لە گرتووخانەکە دا و دووانیان لە هەوڵەکەیاندا سەرکەوتووبوون و چوار کەسەکەی دیکە نەیانتوانی بچنە دەرەوەی گرتووخانەکە.

 

رۆژی سێشەممە 7-3-2023، تەیب عەبدولعەزیز، بەڕێوەبەری گرتووخانەی چاکسازیی ژنان و منداڵانی هەولێر بە تۆڕی میدیایی رووداوی راگەیاند: کاژێر نزیکەی 01:30 خولەکی پاشنیوەڕۆی ئەمڕۆ سێشەممە، هێزە ئەمنییەکان دوای دەستکەوتنی زانیاری و سەرەداو لەسەر ئەو کەسەی لە گرتووخانە هەڵاتبوو، توانییان لە ماڵێکدا لە هەولێر دەستگیری بکەن.

 

تەیب عەبدولعەزیز گوتیشی، "ئەو کەسەی هەڵاتبوو و دەستگیرکراوەتەوە، کوردی رۆژئاوای کوردستانە و تەمەنی 20 ساڵە، بەپێی ماددەی 446ـی دزیکردن راگیرابوو، لە رۆژی 20ـی مانگی شوباتەوە لەلای ئێمەیە و ئەو کەیسەی لەسەری گیرابوو کەیسێکی زۆر قورس نییە." 

 

بەپێی زانیارییەکان کە لە سەرچاوەیەکی پۆلیس وەریگرتبوو، ئەو کەسەی دەستگیرکراوەتەوە ناوی (ب. م)ـە و لە گەڕەکی 94ی باداوانی هەولێر دەستگیرکراوەتەوە، سەرجەم ئەوانەشی کە هەڵاتن و هەوڵی هەڵاتنییان داوە خەڵکی رۆژئاوای کوردستانن و بەپێی ماددەی446ـی یاسای سزادانی عێراقی دەستگیرکراون کە پەیوەستە بە بابەتی دزییەوە.