رۆژنامەڤانێکی کورد لە زیندانی ئیتلاعاتی ورمێ مانی لە خواردن گرتووە

 

بەپێی زانیارییەکانی تۆڕی میدیایی رووداو کە لە کەسێکی نزیک لە مەسعود کوردپوور، رۆژنامەڤان و چالاکڤانی مافی مرۆڤ دەستی کەوتووە، ئەو بەندکراوە لە پەیوەندییەکی تەلەفۆنیدا بە کەسوکاری راگەیاندووە، "هەفتەیەکە مانی لە خواردن گرتووە." 

 

هێزەکانی ئیتلاعات بەڵێنیان پێیدابوو، هەفتەی رابردوو ئەو رۆژنامەڤانە بدەنە دادگە و بگوازرێتەوە بۆ گرتووخانەی گشتی، بەڵام ماوەی راگرتنی لە گرتووخانەی ئیتلاعات درێژ کراوەتەوە.

 

مەسعود کوردپوور 43 رۆژ پێش لە 20/09/2022 لە ماڵەکەی خۆی لە بۆکان لەلایەن هێزەکانی ئیتلاعاتەوە دەستبەسەرکرا و گواسترایەوە بۆ بەڕێوەبەرایەتیی ئیتلاعاتی ورمێ و تاوەکو نزیکەی مانگێک رێگەی پێنەدرابوو پەیوەندی بە کەسوکارییەوە بکات.

 

مەسعود کوردپوور پێشتریش چەندجار بەهۆی چالاکییە رۆژنامەڤانی و مافی مرۆڤییەکانی دەستبەسەرکرابوو. ئاژانسی موکریان لە نێوخۆی رۆژهەڵاتی کوردستانە و هەواڵ و راپۆرت لەبارەی دۆخی مافی مرۆڤ بڵاودەکاتەوە.