ئاسایشی سلێمانی: سێ باندی فرۆشتنی ئامێری قۆپیکردن دەستگیرکران

 

رۆژی یەکشەممە 11-06-2023، بەڕێوەبەرایەتیی ئاسایشی گشتیی سلێمانی رایگەیاند، ئەوان بە هاوئاهەنگی لەگەڵ بەڕێوەبەرایەتیی ئاسایشی رۆژئاوای سلێمانی، سێ باندی شەش کەسییان دەستگیرکردووە کە کاریان فرۆشتنی ئامێرەکانی قۆپیکردن و فریودانی خوێندکاران بووە لە رێگەی تۆڕەکۆمەڵایەتییەکان. 

 

ئاسایشی سلێمانی دەڵێت، سەرجەم ئەندامانی باندەکە دەستگیرکران و رووبەڕووی دادگە کرانەوە و چەندین ئامێر و کەرەستەی قۆپیکردن دەستی بەسەردا گیرا کە ئەمانەن: 

 

- ئامێری (بێسیم) بۆ پەیوەندیکردن، بە چەند شێوازێک کە لە پێڵاو و جلی ژێرەوەی پیاوان و ژناندا شاردرابوونەوە.

- بیستۆک (سەماعە)ـی قۆپیکردن.

- ماستەرکارتی قۆپیکردن.

- قەڵەم جافی قۆپیکردن. 

- دروستکردنی پرسیارەکانی کۆتایی پۆلی 12 بە شێوەی ساختە بۆ فریودان.

 

تۆمەتباران پێکهاتوون لە (ئـ، ف، ح)، (ب، ع، س)، (ئـ، ن، ع)، (ئـ، ع، ح)، (ک، ئـ، م) و (ن، م، م) کە تەمەنیان لە نێوان 19 بۆ 23 ساڵە و دانیشتووی هەرێمی کوردستانن. 

 

بەڕێوەبەرایەتی ئاسایشی گشتیی سلێمانی دەڵێت، ئەو باندە ویستوویانە لە رێگەی تۆڕەکۆمەڵایەتییەکانەوە بە فرۆشتنی ئۆنلاین ئامێرەکانیان ساخبکەنەوە.