دەستەی سەربەخۆی مافی مرۆڤ: کەسێک بۆ ناوبانگ سووکایەتیی بە گۆڕستانێکی مەسیحییەکان کردووە

 

رۆژی یەکشەممە، 11-02-2024، دەستەی سەربەخۆی مافی مرۆڤ لە هەرێمی کوردستان رایگەیاند، دوێنێ شەممە لە گرتەیەکی ڤیدیۆیی کەسێک لە شەقڵاوە سووکایەتی بە گۆڕستانێکی مەسیحییەکان دەکات و قسەی نەشیاو دەکات و هەر لە گرتەکە منداڵێک بەکاردەهێنیت و فێری دەکات کە سووکایەتی بەگۆڕەکان بکات، بۆ ئەو مەبەستە دەستەکەیان داوای لە دەزگا یاسایی و ئەمنییەکان کردووە بۆ ئەوەی رێکاری پێویست بگرنە بەر و ئەو کەسە بدۆزرێتەوە و رادەستی دادگە بکرێت.

 

بەگوێرەی راگەیێندراوی دەستەی مافی مرۆڤ، "دوای بەدواداچوونەکانیان و سەردانی ئاسایشی هەولێر، دەرکەوتووە، ناوبراو ( ر. س. ع.) لەلایەن هێزەکانی ئاسایشەوە دەستگیرکراوە و بەهۆی ئەوەی تەمەنی لەخوار 18 ساڵەوەیە، ئێستا لە چاکسازی ژنان و منداڵان راگیراوە."

 

دەستەی مافی مرۆڤ دەڵێت، سەردانی چاکسازییان کردووە و تۆمەتباریان بینیوە و دانی بەوەداناوە کە ئەو کارەی بەمەبەستی پەیداکردنی ناوبانگ کردووە و بۆ ئەوەی زیاتر لە تۆڕەکۆمەڵایەتییەکان بناسێنرێت و ئێستا "پەشیمانە".

 

ئەو کەسەی سووکایەتی بە گوڕستانەکە کردووە، دانیشتووی شارۆچکەی دارەتووی سەر بە شاری هەولێرە و کاسبکارە. دەستەی مافی مرۆڤ دەڵێت: "ئەو رەفتارانە جۆڕێکە لە دەرەنجامی گوتاری تووندڕۆیی و تۆوی رق و کینە کە خەڵکێک بەردەوام دەیچێنێ لەناو کۆمەڵگە و وادەکات ئەو جۆرە کەسانە سووکایەتی بە ئایینەکان و پیرۆزیی بیرو باوەڕەکان بکەن."