لە کرماشان کەسانی نەناسراو تەقە لە ئاهەنگێکی مارەبڕین دەکەن و سێ کەس دەکوژن

 

ئەمڕۆ شەممە، 11ـی کانوونی دووەمی 2025، هاونیشتمانییەک لە کرماشان بە رووداوی راگەیاند: "شەوی رابردوو لە ئاهەنگێکی مارەبڕین لە گوندی کەرەم بەگ لە پارێزگای کرماشان، کەسانی نەناسراو بە دەموچاوی داپۆشراو تەقەیان لە بەشداربووانی ئاهەنگێک کرد و لە ئەنجامدا دوو پیاو و ژنێك کوژران و چوار کەسی دیکەش بریندار بوون".

 

هاونیشتمانییەکە گوتی: "نەریتی خەڵکی گوندەکە وایە لە کاتی ئاهەنگگێڕاندا تەقەی خۆشی دەکەن. ئەو کەسانەش لەو کاتەدا دەرفەتیان بۆ رەخساوە و تەقەیان لەو کەسانە کردووە کە بەشداربوون لە ئاهەنگەکەدا".

 

هاونیشتمانییەکە ئاماژەی بەوەشکرد: "بریندارەکان بۆ نەخۆشخانەی تاڵقانی لە کرماشان گوێزراونەتەوە"؛ گوتیشی: "لێکۆڵینەوە لە رووداوەکە دەستی پێکردووە".