تەرمی دوو کەس لە قوربانییانی ئاگرکەوتنەوەکەی سۆران دەگەڕێندرێنەوە رۆژهەڵاتی کوردستان

 

 

کاژێر 08:15ی شەوی هەینی لەسەر رێگەی سەرەکیی سۆران – چۆمان ئاگر لە باڵەخانەیەک کەوتەوە، بەهۆیەوە 14 کەس گیانیان لەدەستدا و حەوت کەسی دیکەش بریندار بوون.

 

دووان لەو 14 کەسەی گیانیان لەدەستداوە بە ناوەکانی بەهرام مورادی و عومران مورادی، کە مام و برازان، خەڵکی گوندی دۆستانی ناوچەی شپیرانی سەڵماسن لە پارێزگای ورمێی رۆژهەڵاتی کوردستان.

 

شەهرام مورادی، ئامۆزای بەهرام مورادی بە تۆڕی میدیایی رووداوی گوت، "بڕیارە ئەمڕۆ تەرمی هەردووکیان لە رێگەی دەروازەی نێودەوڵەتیی حاجی ئۆمەرانەوە بگەڕێندرێنەوە رۆژهەڵاتی کوردستان و لە پارێزگای ورمێ بەخاک بسپێردرێن."

 

جگە لەو دوو کەسە، کەسێکی دیکە لەوانەی گیانیان لەدەستداوە، خەڵکی رۆژهەڵاتی کوردستانە و هاوژینەکەی خەڵکی رۆژئاوایە، هەردووکیان رۆژی شەممە 09-12-2032 لە گۆڕستانێکی سۆران بەخاکسپێردران.

 

بڕیارە هەر ئەمڕۆ یەکشەممە رێوڕەسمێک لە هۆڵی بۆنەکانی سۆران بە مەبەستی رێزگرتن، دانانی تاجە گوڵینە و داگیرساندنی مۆم بۆ قوربانییان بەڕێوەبچێت.

 

تاوەکو ئامادەکردنی ئەم هەواڵە، هۆکاری ئاگرکەوتنەوەکە دیار نییە. رۆژی شەممە 09-12-2023 هەڵگورد شێخ نەجیب، سەرپەرشتیاری ئیدارەی سەربەخۆی سۆران بە رووداوی گوت، هەموو ئەوانەی گیانیان لەدەستداوە بەهۆی نەمانی ئۆکسجینەوە بووە و کەسیان بە ئاگر نەسووتاون.

 

ئەو 14 کەسەی لە رووداوەکە گیانیان لەدەستدا، سیانیان خەڵکی رۆژهەڵاتی کوردستانن، دووانیش هاوژینی یەکن و خەڵکی ئیدارەی سەربەخۆی سۆرانن، چواریشیان ئەندامی یەک خێزانن و عەرەبن و خەڵكی پارێزگای بەغدان، هەروەها یەکێکیان خەڵکی رۆژئاوای کوردستانە و دووانیش ناسنامەی سووریایان پێبووە و دیار نییە کوردن یان نا. دوو کەسەکەی دیکەشیان عەرەبی عێراقن.