لە زەماوەندێکدا لە جۆلەمێرگ 5 کیلۆ زێڕ و زیاتر لە 151 هەزار دۆلار بەخشرایە بووک و زاوا

 

 

زەماوەندی سەردار ئادییەمان کوڕی شەفیق ئادییەمان، پیاوماقوڵی عەشیرەتی ژیرکی و دیلان چیفتچی کە لە هەمان عەشیرەتە، رۆژی یەکشەممە 8ی ئەیلوول لە گوندی چاناکلی کرا، کە دەکەوێتە سەر رێگەی سەرەکیی جۆلەمێرگ - وان.

 

سەرۆک عەشیرەتەکان و پیاوماقوڵانی ناوچەکە، سەرۆکی شارەوانیی پارێزگا و قەزا و شارۆچکەکان، کارمەندانی سەربازی، نوێنەری حیزبە سیاسییەکان و رێکخراوە ناحکومییەکان، هەزاران میوان لە ناوخۆ و دەرەوەی وڵاتەوە بەشدارییان لە زەماوەندەکەدا کرد.

 

لەو ناوچەیەی زەماوەندەکەی لێکرا، بەپێی نەریتی عەشیرەتەکە مێزێک دانرا و لەلایەن 15 کەسەوە ئەو پارانە ژمێردرا کە میوانەکان وەکو دیاری پێشکێشی بووک و زاوایان کرد.

 

دوای ژماردنی پارەکە، دەرکەوت 5 ملیۆن و 150 هەزار لیرە کۆکراوەتەوە کە دەکاتە 151 هەزار و 225 دۆلار، هەروەها 5 کیلۆ زێڕ دراوەتە بووک، ئەمەش ژمارەیەکی پێوانەییە تائێستا تۆمار کرابێت.