تورکیا و هەپەگە نوێترین ئاماری شەڕیان بڵاوکردەوە

 

ئەمڕۆ شەممە، 9ـی تشرینی دووەمی 2024، وەزارەتی بەرگریی تورکیا لە هەژماری تایبەتیی خۆی لە تۆڕی کۆمەڵایەتیی ئێکس، گیانلەدەستدانی 10 شەڕڤانی لە رۆژئاوای کوردستان و ناوچەکانی دیکەی ژێر دەسەڵاتی هەسەدە و سێ گەریلای لە هەرێمی کوردستان لە ئەنجامی زنجیرەیەک هێرشی ئاسمانی و تۆپباران بڵاوکردەوە.

 

وەزارەتی بەرگریی تورکیا دەڵێت، ئۆپەراسیۆنەکان لە هەر دۆخ و هەلومەرجێکدا بەردەوام دەبن. 

 

هەر ئەمڕۆ، ناوەندی چاپەمەنی و راگەیاندنی هەپەگە رایگەیاند، لە 24 کاژێری رابردوودا هێرشیان کردووەتە سەر هێزەکانی تورکیا لە ناوچەی زاپ لە هەرێمی کوردستان و لە ئەنجامدا دوو سەرباز کوژراون. 

 

هەپەگە دەشڵێت، لە ناوچەکانی مەتین و زاپ دوو درۆنی هێزەکانی تورکیایان خستووەتە خوارەوە. 

 

ئەم شەڕ و پێکدادانەی نێوان سوپای تورکیا و گەریلاکانی پەکەکە لە هەرێمی کوردستان لە چوارچێوەی ئۆپەراسیۆنێکدایە تورکیا ناوی ناوە چنگ- قوفڵ و لە بەرەبەیانی رۆژی 18ـی نیسانی 2022 لە ناوچەکانی ئاڤاشین، مەتین و زاپ لە هەرێمی کوردستان بۆ سەر پێگەکانی پەکەکە دەستیپێکرد.