یەکێتی ئەندامانی مەکتەبی سیاسی هەڵدەبژێرێت

 

 

بەگوێرەی زانیارییەکانی تۆڕی میدیایی رووداو، کۆبوونەوەکە کاژێر 3:00ی پاشنیوەڕۆ بە سەرۆکایەتیی بافڵ تاڵەبانی، سەرۆکی یەکێتی دەبێت.

 

ئەمە دووەم کۆبوونەوەی ئەنجوومەنی سەرکردایەتیی نوێی یەکێتییە و بڕیارە تێیدا ئەندامانی مەکتەبی سیاسی هەڵبژێردرێن.

 

رۆژی یەکشەممە 08-10-2023 ئەنجوومەنی سەرکردایەتیی نوێی یەکێتی یەکەم کۆبوونەوەی کرد، تێیدا لیژنەی ئامادەکاریی کۆنگرەی پێنجەمی حیزبەکە ئامادەبوو و باسی لە کارەکانی کۆنگرە کرد.

 

لەو کۆبوونەوەیەدا لیژنەی ئامادەکاری کۆنگرە، نێوەڕۆکی راپۆرتێکی 70 لاپەڕەیی لەبارەی کارەکانی کۆنگرە روونکردەوە.

 

رۆژی 27-09-2023 کۆنگرەی پێنجەمی یەکێتیی نیشتمانیی کوردستان دەستیپێکرد و رۆژی 1ی ئەم مانگەش پەیڕەوی نێوخۆی حیزبەکە پەسند کرا.

 

لە کۆنگرەکەدا جەعفەر شێخ مستەفا وەکو سکرتێری ئەنجوومەنی بەرژەوەندییە باڵاکانی یەکێتی هەڵبژێردرا. پێشتر کۆسرەت رەسووڵ عەلی بە ناونیشانی سەرۆک ئەو پۆستەی هەبوو. حاجی مەسیفیش بە سکرتێری ئەنجوومەنی پشتیوانیی یەكێتی دەستنیشان کرا کە ئەنجوومەنەکە لە 100 ئەندام پێكدێت و ئەندامەكانی لەلایەن سەرۆكی یەكێتییەوە دەستنیشان دەكرێن.