کاسبکارێک لە شنۆ بە تەقەی هێزەکانی ئێران گیانی لەدەستدا
رووداو دیجیتاڵ
هێزەکانی سوپای پاسداران لە گوندێکی سنووری شنۆ هەڵیانکوتایە سەر شوێنی مانەوەی ژمارەیەک کاسبکار، لە ئەنجامی تەقەی هێزەکانی پاسدارانیش کاسبکارێک کوژرا و چەند کەسێکیش بریندار بوون. لە کاتی رووداوەکەدا تەقە لە هێزەکەی سوپای پاسدارانیش کرا و دوو ئەندامیان بریندار کران.
بەگوێرەی زانیارییەکانی تۆڕی میدیایی رووداو، بەرەبەیانی ئەمڕۆ سێشەممە هێزێکی سوپای پاسداران لە گوندی تاژندەرێی سنووری شاری شنۆ لە پارێزگای ورمێ، بە بیانووی بوونی کەلوپەلی قاچاخ چوونەتە سەر ماڵێک کە ژمارەیەک کاسبکاری کوردی خەڵکی سەڵماس و ورمێی تێدا بووە.
دانیشتووانی گوندەکە دەڵێن، هێزەکانی سوپای پاسداران تەقەیان لە ماڵەکە کردووە و لە ئەنجامدا کاسبکارێک بەناوی رامین شکاک، خەڵکی سەڵماس کوژراوە و چەند کەسێکی دیکەش بریندار بوون.
شایەتحاڵان باس لەوە دەکەن، لەکاتی هێرشەکەدا تەقە لە هێزەکەی سوپای پاسدارانیش کراوە و دوو ئەندامیان بریندار کراون.
بەپێی ئەو گرتە ڤیدیۆییانەی بڵاوکراونەتەوە، لە ئەنجامی هێرشەکەی سوپای پاسداراندا چەند ئەسپێک کە لە تەویلەی ماڵەکەدا راگیرابوون، مردار یان بریندار بوون.