پۆلیسی سلێمانی: 10 هاووڵاتیی ئەفغانستانیمان دەستگیرکرد

 

ئەمڕۆ دووشەممە، 8ی نیسانی 2024، سەرکەوت ئەحمەد، گوتەبێژی پۆلیسی سلێمانی بە رووداوی گوت، "ئەو 10 هاووڵاتییە لە سنووری پێنجوێنەوە هاتبوون. پۆلیسی چاودێری کردن و دەستگیری کردن، دادوەر هەر بڕیارێک بدات جێبەجێی دەکەین".

 

لەکاتی لێکۆڵینەوەکاندا هاووڵاتییەکان دانیان بەوە داناوە کە بەنایاسایی لە ئێرانەوە هاتوونەتە هەرێمی کوردستان و بەنیاز بوون بچنە شارەکانی نێوەڕاست و باشووری عێراق و لەوێ کاربکەن، ئەمە بە گوتەی پۆلیسی سلێمانی.

 

پەڕاوی لێکۆڵینەوە بۆ هەموو هاووڵاتییەکان کراوەتەوە و بەپێی مادەی 39 لە یاسای نشینگە راگیراون و لێکۆڵینەوە لەگەڵیان بەردەوامە. 

 

هاوینی 2021 بزووتنەوەی تاڵیبان شاری کابوولی پایتەختی ئەفغانستانی کۆنترۆڵکردەوە. هاووڵاتییانی ئەو وڵاتە لەو کاتەوە لە دۆخێکی سەختدا دەژین. نەتەوە یەکگرتووەکان دەڵێت، نزیکەی هەموو هاووڵاتییانی ئەفغانستان ئێستا هەژارن.

 

رێکخراوی کۆچی نێودەوڵەتیش دەڵێت، تەنیا لە ساڵانی 2021 و 2022دا 3.6 ملیۆن ئەفغانستانی وڵاتی خۆیان جێهێشتووە.