لێکۆڵینەوە لە هۆکاری ئاگرەکەی بازاڕی لەنگە دەکرێت؛ 'بە ئەنقەست بوو'

 

ئاگرەکەی ئەمڕۆی بازاڕی لەنگە "48 دووکانی" سووتاند. بە 17 تیمی ئاگرکوژێنەوە توانرا ئاگرەکە کۆنتڕۆڵبکرێت.

 

رۆژی دووشەممە، 08-04-2024، ئیبراهیم سەعید، یەکێک لەو دووکاندارانەی کە دووکانەکەی سووتا، لە بەرنامەی بەرپرسیاری تۆڕی میدیایی رووداو کە رێبوار عەلی پێشکێشی دەکات، گوتی: "بەهۆی کێشەی نێوان سیکوریتییەکان بازاڕەکە سووتا".

 

دوای ئاگرەکەی 41 رۆژ لەمەوبەری بازاڕەکە، ژمارەی پاسەوانان بۆ 38 پاسەوان زیادکرا بەشێوەی دوو دەوامی، هاوکات کۆمپانیاکە پارەی مانگانەی لەسەر دووکانداران زیادکرد.

 

سامان سەروەت، یەکێکە لە ئەنجوومی بازاڕەکە، بە گومانە لە کارنەکردنی کامێرای چاودێریی شوێنی ئاگرکەوتنەوەکە؛ "پێم وایە سیکوریتیی پێشوو لەگەڵ ئەوانەی ئێستا پێکهاتوون ئینجا نازانم چەندیان وەرگرتووە و هاتن و دەستبەکاربوون. گومانمان هەیە لەو کامێرانە کە بۆچی ئیشیان نەکردووە"

 

سەرچاوەیەکی تایبەت بە تۆڕی میدیایی رووداوی گوت: هیچ دەستێکی ئەنقەست لە ئاگرکەوتنەوەکەی ئەمڕۆی بازاڕی لەنگەدا نییە و ئەوە تەنیا قسەی ئەو دووکاندارانەیە کە زیانیان بەرکەوتووە.

 

لەبارەی قەرەبووکردنەوەی زیانەکانی ئاگرەکەی 41 رۆژ لەمەوبەریش، ئەو سەرچاوەیە گوتی، بازاڕەکەمان بۆ نۆژەنکردوونەتەوە و تاوەکو ئێستاش کارکردن تێیدا بەردەوامە. "لە ئاگرەکەی ئەمڕۆش 48 دووکان سووتاون و لێکۆڵینەوە لە هۆکاری ئاگرەکەش دەکرێت، دواتر ئەنجامەکەی بۆ رای گشتی دەخەینە ڕوو".

 

لە ئاگرەکەی پێشووی بازاڕی لەنگەی هەولێر 166 دووکان سووتان و تاوەکو ئێستاش قەرەبوو نەکراونەتەوە. سەندیکای پیشەوەران و کاسبکاران لە هەوڵدایە لەلایەن حکومەتی عێراقەوە زیانبەرکەوتووان قەرەبوو بکرێنەوە.

 

کاروان خۆشناو، لێپرسراوی سەندیکای پیشەوەران و کاسبکارانی هەولێر، بە تۆڕی میدیایی رووداوی گوت: "زیانەکانی ئاگری پێشووی بازاڕی لەنگەمان گەیاندووەتە حکومەتی عێراق و چاوەڕێی ئەنجام و قەرەبووکردنەوەین. زیانەکانی ئاگری ئەمڕۆشمان دەخەمڵێنین و ئەوەش بۆ حکومەتی عێراق دەنێرین بۆ قەرەبووکردنەوەی زیانبەرکەوتووان بە پارە".

 

بازاڕی لەنگە یەکێکە لە بازاڕە میلی و هەرە قەرەباڵخەکانی شاری هەولێر، کە بەوە دەناسرێت کاڵاکانی بەراورد بە شوێنەکانی دیکە هەرزانن.