مۆڵەتی گەڕان بەدوای نەوتدا لە ئامەد و رووها درێژکرایەوە

 

 

بەگوێرەی ئەو بڕیارەی ئەمڕۆ هەینی لە رۆژنامەی فەرمی تورکیا بڵاوکراوەتەوە، مۆڵەتی گەڕان بەدوای نەوت لە کێڵگەکانی سنووری پارێزگاکانی ئامەد و رووهای باکووری کوردستان و کرکڵارئەلی و ئەدیرنەی تورکیا بۆ ماوەی دوو ساڵ درێژکراوەتەوە. 

 

بڕیارەکەی بەڕێوەبەرایەتیی گشتیی کاروباری کانگا و نەوتی سەر بە وەزارەتی وزە و سامانە سرووشتییەکانی تورکیا دوای ئەوەی لە ژمارەی ئەمڕۆی رۆژنامەی فەرمیدا بڵاوکرایەوە، کەوتە بواری جێبەجێکردنەوە.

 

بەپێی بڕیارەکە؛ ماوەی کارابوونی مۆڵەتی کارپێکردنی نەوتی کێڵگەی 45 هەزار و 783 هێکتاری ئامەد و رووها لە 30ـی کانوونی یەکەمی 2023 بە مەبەستی دیاریکردنی توانای هایدرۆکاربۆنی ناوچەکە و هێنانی بۆ ناو ئابووریی وڵات، بۆ ماوەی دوو ساڵ درێژکراوەتەوە.