پێشبینیی دەکرێت "شەپۆلێکی بەهێزی بارانبارین" هەرێمی کوردستان بگرێتەوە

 

رۆژی پێنجشەممە، 08-02-2024، بەشی کەشناسی سەر بە وەزارەتی گواستنەوە و گەیاندن رایگەیاند، پێشبینی دەکرێت سبەی هەینی ئاسمان لە نیمچە هەورەوە بگۆڕێت بۆ هەوری تەواو، لەکاتەکانی بەیانیی زووشدا لە هەندێک لە ناوچە شاخاوییەکان ئەگەری دروستبوونی تەم هەیە بۆ ماوەیەکی کورت و لەکاتەکانی دوای نیوەڕۆ لە ناوچە سنوورییەکانی باشووری رۆژئاوای هەرێمی کوردستان ئەگەری کەمێک تۆز و خۆڵ هەیە.

 

رۆژی چوارشەممە، 07ـی ئەم مانگە، محەممەد کەمال، شارەزای کەشناسی بە تۆڕی میدیایی رووداوی گوت، هەفتەی داهاتوو دوو شەپۆلی بارانبارین دەستپێدەکەن؛ یەکەمیان دەکەوێتە دووشەممە و سێشەممە کە لاواز دەبێت؛ دووەم شەپۆل دەکەوێتە چوارشەممە و کۆتایی هەفتەی داهاتوو، کە زۆر بەهێز دەبێت و هەموو ناوچەکانی هەرێمی کوردستان دەگرێتەوە. 

 

محەممەد کەمال گوتی، بارانبارینی چوارشەممەی داهاتوو بەهێز دەبێت و مەترسیی دروستبوونی "لافاو"یش لە گەرمیان، سلێمانی، کەرکووک و هەولێر هەیە؛ ئەو شەپۆلی بارانبارینە تاوەکو 19ـی مانگ بەردەوام دەبێت.

 

بەگوێرەی پێشبینییەکانی ئەو شارەزایەی کەشناسی، کەمترین بارانبارین کە پێشبینی دەکرێت چوارشەممە ببارێت، 50 ملم و زۆرترین 100 ملیم دەبێت. دەشڵێت، "ئەم مانگە بارانی باشمان دەبێت و زۆربەی ناوچەکان دەگرێتەوە."

 

بەرزترین پلەکانی گەرمای پێشبینیکراو بە پلەی سیلیزی بۆ سبەی هەینی بەمشێوەیە دەبێت:

 

- هەولێر: 16 سیلیزی

- سلێمانی: 13 سیلیزی

- دهۆک: 15 سیلیزی

- کەرکووک: 18 سیلیزی

- هەڵەبجە: 15 سیلیزی

- زاخۆ: 15 سیلیزی

- سۆران: 11 سیلیزی

- حاجی ئۆمەران: 7 سیلیزی

- گەرمیان: 19 سیلیزی