لە زانکۆیەکی باکووری کوردستان داواکاری بۆ خوێندن لە زمان و ئەدەبی کوردی "50% زیادی کردووە"

زانکۆی ئاڵپئارسڵان لە پارێزگای مووشی باکووری کوردستانە و ئەمساڵ 30 کورسیی تایبەت بە وانەی زمانی کوردی هەبوو، کە هەموویان داواکراون.

 

هیدایەت کاڕا، یاریدەدەری راگری کۆلێژی ئەدەبیات لە زانکۆی ئاڵپئارسڵان بە تۆڕی میدیایی رووداوی راگەیاند، بەشی زمانی و ئەدەبی کوردی لە زانکۆکەیاندا بەراورد بە ساڵانی رابردوو، ئەمساڵ داواکاریی زیاتری پێکێشکرا و کورسییەکانی پڕبوونەتەوە. هەروەها گوتی: "نزیکەی 50٪ داواکاری بۆ بەشی زمان و ئەدەبی کوردی لە زانکۆی ئاڵپئارسڵان زیادی کردووە. بۆ نموونە ئێستا لە پۆلەکانی دووەم و سێیەمدا 15 خوێندکار دەخوێنن، ئەمساڵ 30 کەس بەشی زمان و ئەدەبی کوردیی زانکۆی ئاڵپئارسڵانیان هەڵبژاردووە. 26 لەوانە خۆیان تۆمارکردووە و ئامادەی خوێندنن".

 

ئەم داواکارییە زۆرە لەسەر بەشی زمانی کوردیی زانکۆکانی باکووری کوردستان لەکاتێکدایە، حکومەتی تورکیا بەگوێرەی پێویست مامۆستای زمانی کوردیی دانەمەزراندووە. 

 

لە تورکیا و باکووری کوردستاندا ملیۆنێک و 148 هەزار مامۆستا هەن، کە تەنیا 79یان مامۆستای زمانی کوردین.

 

ساڵی 2018 سێ مامۆستای زمانی کوردی دامەزرێندران. ساڵی 2019 مامۆستای زمانی کوردی دانەمەزرێندرا. ساڵی 2020 یەک مامۆستای زمانی کوردی دامەزرێندرا. ساڵی 2021یش تەنیا سێ مامۆستای زمانی کوردی دامەزرێندران.

 

لەبارەی ژمارەی مامۆستایانەوە هیدایەت کاڕا، گوتی: "لە بەشی زمان و ئەدەبی کوردیدا 5 مامۆستامان هەن. هەروەها 5 مامۆستای لێکۆڵەریشمان هەن کە لەڕێی ئەم ستافەوە وانەکان دەگوترێنەوە".

 

هیدایەت کاڕا ئاماژەی بەوە دا، زۆربەی ئەو خوێندکارانەی داوای خوێندنیان لە بەشی زمان و ئەدەبی کوردیی زانکۆی ئاڵپئارسڵان کردووە، لە مووشن و خوێندکاریشیان هەن، کە دانیشتووی شارەکانی دیکەن.

 

لە قۆناخی یەکەمی بەشی زمان و ئەدەبی کوردیی زانکۆی ئاڵپئارسڵاندا زیاتر گرنگی بە رێزمان، نووسین و گفتوگۆ دەدرێت. وانەکان دوو کاژێری و سێ کاژێرین. لە قۆناخەکانی دیکەدا زیاتر زمانی مۆدێرن و رێزمانی شێوەزارەکانی سۆرانی و زازاکی دەخویندرێن. هەروەها وانەکانی وەکو ئەدەبیاتی کلاسیکیی کوردی، ئەدەبیاتی هاوچەرخی کوردی و ئەدەبیاتی کوردی، ئەدەبیاتی فۆلکلۆریی کوردی و ژمارەیەک وانەی دیکە هەن.

 

سەبارەت بە وانەی رێزمانی کوردیی شێوەزاری سۆرانی لەلایەن چ مامۆستایەکەوە دەگوترێتەوە، ئایا مامۆستای هەرێمی کوردستان لە ستافەکەیاندا هەیە؟ لە وەڵامدا گوتی: "ئێستا وانەی رێزمانی شێوەزاری کوردیی سۆرانی لەلایەن مامۆستایەکەوە دەگوترێتەوە کە خەڵکی مووشە".

 

ئەمساڵ نەک تەنیا لە زانکۆی ئاڵپئارسڵانی مووش، بەڵکو لە بەشی "زمان و ئەدەبی کوردی" لە هەریەک لە زانکۆکانی ئارتوکڵوی پارێزگای مێردین و مونزوری پارێزگای دێرسیم و زانکۆی بینگۆڵ لە چەولیکیش پڕبوون.

 

بەپێی دابەشکارییەکە، 30 کورسی لە زانکۆی ئارتوکڵو، 30 کورسی لە زانکۆی ئاڵپئارسڵان، 39 کورسی لە زانکۆی بینگۆڵ لە چەولیک، 25 کورسی لە زانکۆی مونزور بۆ بەشی زمان و ئەدەب و کولتووری کوردی تەرخانکراون.

 

بەهۆی زیادبوونی داواکاری بۆ خوێندن لە بەشی زمان و ئەدەبی کوردی، پلان هەیە ساڵی داهاتوو داواکاری پێشکێش بە دامەزراوەی خوێندنی باڵای تورکیا بکرێت بە مەبەستی زیادکردنی کورسییەکان.