هاونیشتمانییەک لە مەندەلی: دەنگ بە یەکێک دەدەین هاوکاریی شارەکە بکات

 

 

فەهد عەبدولکەریم، خانەشینە و دەڵێت: "دەچین بۆ هەڵبژاردن، ئێمە کوردین و کەسێکی باش هەڵدەبژێرین کە هاوکاریی مەندەلی بکات و کاری بۆ بکات."

 

عەبدولسەلام ئیسماعیلیش ناسیاوی فەهدە و دووکاندارە، دەڵێت، "هەر کەسێک بێت هەڵی دەبژێرن، مەرجی ئەوان ئەوەیە کە هاوکاریی مەندەلی بکات."

 

حوسێن عەلی، پۆلیسە و دەڵێت، خۆی و خێزانەکەی دەچن بۆ هەڵبژاردن و دەنگ بە یەکێک لە بەربژێرە کوردەکان دەدەن. 

 

ئەگەر قەزاکانی خانەقین و مەندەلی لە دیالە پێگە و سەنگی دەنگی کورد بن، خوورماتووی لکێندراو بە سەلاحەدینیش، تاکە قەزای کوردییە کە حیزبە کوردستانییەکان چاویان بڕیوەتە دەنگی دەنگدەرانی، بەڵام پەرتەوازەیی و پێکهێنانی هاوپەیمانێتییان لەگەڵ عێراقییەکان، نیگەرانیی هاونیشتمانییانی لێکەوتووەتەوە.

 

مەندیل ئیبراهیم، دانیشتووی خورماتووە و خانەنشینە، بە پەندێکی باوی کوردی بیری بەربژێر و حیزبەکان دەهێنێتەوە کە بەهێزی لە یەکگرتندایە. "ئێستا من چوار دار دەبڕمەوە و هەر چواری دەبەسم بەیەکەوە، تۆ بۆت دەشکێت؟ ئەگەر تاک تاک بێت دەیشکێنی، ئەگەر بەیەکەوە بن نایشکێنی."

 

لە کەرکووک دوای 18 ساڵ و نەینەوا، سەلاحەدین و دیالە دوای 10 ساڵ هەڵبژاردنی ئەنجوومەنی پارێزگاکان بەڕێوەدەچێت. ئەگەر ئەوکات لیستی هاوبەش و یەکدەنگیی کورد بۆ بوونە دووەم هاوکار بووبێ، ئێستا شیعە باڵادەستتر و سوننە یەکگرتووتر لە هەڵبژاردنەکاندا بەشدارن.