پۆلیسی هەڵەبجە: کەسێک لە خورماڵ 20 ملیۆن دیناری لە ماڵی براکەی دزیوە

 

رۆژی سێشەممە 6-12-2022، موقەدەم بەرزان عوسمان، گوتەبێژی پۆلیسی پارێزگای هەڵەبجە لەبارەی دەستگیرکردنی چوار تۆمەتبار بە تۆمەتی دزیکردن بە تۆڕی میدیایی رووداوی گوت: "بەتۆمەتی دزینی قاسەی ماڵێک لە گەڕەکی ئەردەڵانی ناحیەی خورماڵ کە بڕی 20 ملیۆن دیناری عێراقی تێدابووە، هێزەکانی بنکەی پۆلیسی خورماڵ 4 تۆمەتباریان دەستگیرکرد کە پێکەوە و بەهاوبەشی پارەکەیان بردبوو."

 

بە قسەی گوتەبێژی پۆلیسی هەڵەبجە، یەکێک لەو کەسانەی دزیەکەیان کردووە برای خاوەن ماڵەکەیە.

 

لەبارەی لێکۆڵینەوە لەگەڵ تۆمەتبارەکان، بەرزان عوسمان گوتی:" دوای لێکۆڵینەوە لەگەڵیان، تۆمەتبارەکان لەبەردەم دادوەری لێکۆڵینەوەی هەڵەبجە دانیان بە تاوانەکەیاندا نا و قاسەکە و بڕە پارەکە دەستی بەسەرداگیرا کە لەگوندی گوڵپ و لەژێرخۆڵدا شاردبوویانەوە."

 

موقەدەم بەرزان عوسمان زانیاریی زیاتریشی لەسەر تۆمەتبارەکان ئاشکراکرد کە تەمەنیان لەنێوان 16 بۆ 22 ساڵیدایە و گوتی، سەرجەم تۆمەتبارەکان دانیشتووی ناحیەی خورماڵن و بەپێی مادەی 443ـی یاسای سزادانی عێراقی بەندکراون.