سەرپەرشتیاری ئیدارەی سۆران: دەروازەی سیدەکان لە قۆناخی یەکەم بۆ گەشتیاری دەبێت

 

رۆژی چوارشەممە، 06-09-2023، هەڵگورد شێخ نەجیب، سەرپەرشتیاری ئیدارەی سەربەخۆی سۆران لەبارەی کردنەوەی دەروازەی کێلەشین لە سنووری سیدەکان بە تۆڕی میدیایی رووداوی گوت، "لەلایەن حکومەتی هەرێمی کوردستان و کۆماری ئیسلامیی ئێرانیشەوە رەزامەندی لەسەر کردنەوەی دەروازەکە دراوە. ئێستا کار لەسەر میکانیزمی کردنەوەکە دەکەین و وەکو یەکەم قۆناخ کار لەسەر رێگەوبانەکەی دەکەین تاوەکو سەر سنوور."

 

سەرپەرشتیاری ئیدارەی سەربەخۆی سۆران دەڵێت، "لە بەشێکی رێگەوبانەکان دەست بە قیرتاوکردن کراوە و هەر گەیشتە سەر سنوور دەست بە کردنەوەی دەروازەکە دەکەین کە هەموو هەوڵەکانیش بۆ ئەوەیە ئەمساڵ بکرێتەوە."

 

بە گوتەی هەڵگورد شێخ نەجیب، دەوازەکە سەرەتا بۆ هاتووچۆی گەشتیاری دەکرێتەوە و دواتر بۆ هاتووچۆی بازرگانی و دەشڵێت، "کردنەوەی دەروازەکە بۆ گەشتیاری و بازرگانیش قۆناخ بە قۆناخ دەبێت."

 

عەبدوڵلا ئاکرەیی، بەرپرسی پەیوەندییەکانی ھەرێمی کوردستان و ئێران لە فەرمانگەی پەیوەندییەکانی دەرەوەی هەرێمی کوردستانیش بە رووداوی گوت، "وەزارەتی ناوخۆی ئێران، پارێزگاری ورمێ و قایمقامی شنۆش رەزامەندییان لەسەر کردنەوەی دەروازەکە داوە. ئێمەش داوامان کردووە کۆمپانیایەکی ئێرانی بێت و گرێبەست واژۆ بکەین بۆ ئەوەی دەست بە چاککردنی رێگەوبانەکانی دەروازە بکەن. ئێستا چاوەڕوانی ئێرانین بۆ ئەوەی کۆمپانیایەک بنێرن و تۆپەکە لە گۆڕەپانی ئەوان ماوەتەوە."

 

لەنێوان هەرێمی کوردستان و ئێران حەوت دەروازەی سنووری هەن؛ سێ فەرمی و چواریشیان نیمچە فەرمین؛ دەروازە فەرمییەکان هەریەک لە دەروازەی پەروێزخان لە سنووری ئیدارەی گەرمیان، حاجی ئۆمەران لە سنووری پارێزگای هەولێر و باشماخ لە سنووری پارێزگای سلێمانی پێکدێن.