هاوسەرۆکی پێشووی شارەوانیی دێرسم ئازادکرا

محەممەدعەلی بول، هاوسەرۆکی پێشووی شارەوانیی دێرسم کە لە ساڵی 2016 بە تۆمەتی "ئەندامبوون لە رێکخراوێکی تیرۆریستی" دەستگیرکرا و قەییووم لە شوێنی دانرا، ئێوارەی رۆژی سێشەممە، 5ی ئەیلوولی 2023 ئازاد کرا. 

 

ئایتەن کۆردو، پەرلەمانتاری پارتی چەپی سەوز-یەسەپە لە بازنەی دێرسم و ژمارەیەک لە ئەندامانی ئەو پارتە و ماڵباتەکەی لە فڕۆکەخانەی خارپێت پێشوازییان لە محەممەدعەلی بول، هاوسەرۆکی پێشووی شارەوانیی دێرسم کرد و دواتر بەرەو دێرسم بەڕێکەوتن. 

 

محەممەدعەلی بول لە هەڵبژاردنە خۆجێیەکانی ساڵی 2014 لەلایەن پارتی ئاشتی و دیموکراسی-بەدەپە بۆ شارەوانی دێرسم بەربژێر کرا و لە هەڵبژاردنەکەدا 42٪ـی دەنگەکانی بەدەستهێنا و بووە هاوسەرۆکی شارەوانی دێرسم. 

 

محەممەدعەلی بول کە لە 17ـی تشرینی دووەمی 2016 دەستگیرکرا و لەلایەن دادگەی باڵای تاوانی دێرسمەوە سزای هەشت ساڵ و نۆ مانگ زیندانی بەسەردا سەپێندرا، لە زیندانی سینجان لە ئەنقەرە زیندانی بوو. ئەو خێزاندارە و باوکی دوو منداڵە.