لە کرماشان بەهۆی وەرگەڕانی تراکتۆرێک منداڵێکی 5 ساڵان گیانی لەدەستدا

 

بە پێی ئەو زانیارییانەی کە رێکخراوی هەنگاو بۆ مافی مرۆڤ رۆژی یەکشەممە بڵاوی کردوونەتەوە، رۆژی شەممە، 5-8-2023  بنەماڵەیەکی خەڵکی گوندی "حەسەن سولەیمان"ی سەر بەر شاری سەرپێلی زەهاو بۆ دابینکردنی ئاوی خواردنەوەی رۆژانەیان بە تراکتۆر چوونەتە ناوچە شاخاوییەکانی دەوروبەری گوندەکەیان، بەڵام لە کاتی گەڕانەوەدا تراکتۆرەکەیان وەرگەڕاوە. لە رووداوەکەدا منداڵێک بە ناوی ئاگرین عەلیمورادی گیانی لەدەستداوە. 

 

هەر بەپێی زانیارییەکان، دوو ئەندامی دیکەی ئەم بنەماڵەیە کە بەتەمەنن، بە سەختی بریندار بوونە.

 

بەپێی ئاژانسی فەرمی حکومەتی ئێران - ئیرنا؛ لە کۆی گشتیی 226 گوندی سەر بە شاری سەرپێڵی زەهاو، لانیکەم 76 گوند کێشەی بێئاوی یان کەمئاویان هەیە.