پێنج منداڵی خێزانێک لە سۆران لەبەر نەبوونی دەستبەرداری خوێندن دەبن

 

نەخۆشکەوتنی کوڕێکی ئەو خێزانە پێش چەند ساڵێک و خەرجیی زۆری چارەسەرکردنی، هەموو دەرگاکانی خۆشبەختی و خۆشژیانی لەسەر داخستن.

 

خاوەنماڵ پێشمەرگەیە و دەڵێت تائیستاش قەرزەکانی چارەسەرکردنی کوڕەکەی دەداتەوە، لەبەرئەوەشە ماوەی سێ ساڵە مووچەکەی نەهێناوەتەوە ماڵەوە.

 

هیوا ئەنوەر، خاوەنماڵە و دەڵێ "سێ، چوار ساڵ پێش ئێستا، کوڕێکم نەخۆشییەکی هەبوو و بەردەبووەوە، بۆیە هاتووچۆی ئێرانم پێ کرد بۆ چارەسەر، پارەی زۆرم بۆ چارەسەرکردنی کوڕەکەم قەرز کرد، بەڕاستی ئەوەی کە بێت و بەسەرمانبکاتەوە، ئەگەر بە یەک 250ـش بێت، حیساب بکە حەجێکی کردووە، ئەوەندە دۆخی ژیانمان خراپە." 

 

خێزانەکە لەڕێگەی قەرزی زۆر، چارەسەری کوڕەکەیان کرد، بەڵام خۆشیان پێویستییان بە چارەسەرە و نەبوونی پارە، چارەسەرکردنی دواخستوون، هەر ئەوەش نا، بەڵکو هەژاری ناچاری کردوون هەر پێنج منداڵەکەیان لە خوێندن بهێننە دەرەوە.

 

دایکی منداڵەکان دەڵێ "یەک دینار لە ماڵماندا نییە، منداڵەکانم داوای شتم لێ دەکەن، بەڵام باری داراییمان ئەوەندە خراپ بوو، کە لەبەر نەبوونی منداڵەکانیشمان لە قوتابخانە هێنانە دەرەوە."

 

خانووێکی وێران شوێنی ژیانی ئەو خێزانەیە، 100 هەزار دینار کرێی مانگانەی خانووەکەیانە و چاویان لە دەستی خێرخوازانە لەم نەهامەتییە رزگاریان بکەن.