وەزارەتی دارایی عێراق بە بێ گەڕانەوە بۆ دیوانی چاودێری، وردبینی لە لیستی مووچە دەکات

 

یوسف کیلابی، ئەندامی لیژنەی دارایی پەرلەمانی عێراق بە رووداوی گوت "جێبەجێکردنی بڕیارەکەی دادگەی فیدراڵی و یاسای بودجەی گشتی بەتەواوەتی کێشەکە چارەسەر دەکات. ئێمە بەردەوام هاوکار دەبین بۆ فەرمانبەرانی هەرێمی کوردستان تاوەکو ئەوکاتەی مووچەکانیان وەردەگرن، هاوشێوەی هەموو فەرمانبەرانی عێراق."

 

‎بەغدا بڕیاری داوە لە دوای ناردنی مووچەی مانگی شوبات، تاوەکو بەبانکیکردنی مووچە، هیچ پارەیەک بۆ مووچەی فەرمانبەرانی هەرێمی کوردستان نەنێرێت.

 

محەممەد نووری، ئەندامی لیژنەی دارایی پەرلەمانی عێراق دەڵێ "بۆ کۆتاییهێنانی یەکجارەکی بەم مشتومڕەی لەنێوان حکومەتی هەرێم و حکومەتی فیدراڵیدایە، بۆ وەرگرتنی مووچەی فەرمانبەرانی هەرێم بەتەواوی و بەبێ دواکەوتن، دەبێت بە میکانیزمی بەئەلیکترۆنیکردن و لەڕێگەی دەرکردنی هەژماری بانکییەوە بێت، پارەدارکردنەکەش راستەوخۆ لەلایەن وەزارەتی دارایی فیدراڵییەوە بێت."

 

‎بەپێی یاسای بودجەی گشتیی عێراق پشکی هەرێمی کوردستان 12.67٪ـە، بەڵام هێشتا چارەنووسی مووچەی سێ مانگی کۆتایی ساڵی رابردووی مووچەخۆرانی هەرێمی کوردستان یەکلانەبووەتەوە.

 

‎وەزارەتی دارایی حکومەتی هەرێمی کوردستان رایگەیاندووە؛ بۆ دابینکردنی مووچەی مووچەخۆرانی هەرێمی کوردستان، پێویستیان بە زیاتر لە 940 ملیار دینارە، بۆیە لەگەڵ گەیشتنی لیستی فەرمانبەران بۆ بەغدا، وەزارەتی دارایی عێراق، داهاتی ناوخۆی هەرێمی کوردستانی لێدەردەکات، کە 320 ملیار دینارە، ئینجا پارەکە دەنێرێت.